Таптыыр кэргэним, күн сирин көрдөрбүт күндү ийэбит, элэккэй, эйэҕэс эбэбит

 

 

Майаҕа баһаар содулуттан олус соһуччу, хомолтолоохтук күн сириттэн күрэммитэ от ыйын 14 күнүгэр 40 хонугун туолар.

 

Биһиги ийэбит, эбэбит 1951 сыллаахха тохсунньу 10 күнүгэр алта оҕолоох Варвара уонна Кузьма Васильевтар дьиэ кэргэннэригэр бэһис оҕонон күн сирин көрбүтэ. Бырама алын кылаастаах оскуолатын бүтэрэн, 1963–1966 сылларга Наахара оскуолатыгар үөрэммитэ, салгыы В.Г. Короленко аатынан Амма орто оскуолатын 1968 сыллаахха бүтэрбитэ. “Оскуола–производство–үрдүк үөрэх” ыҥырыынан Бөтүҥҥэ икки сыл ыанньыксытынан үлэлээбитэ. 1971 сыллаахха Ленинград куоракка А.И. Герцен аатынан педагогическай институкка киирэн 1976 сыллаахха үөрэҕин ситиһиилээхтик бүтэрбитэ. Физика, математика учуутала идэлээх дойдутугар Мэҥэ Хаҥаласка кэлэн 48 сыл устата үрдүк таһаарыылаахтык үлэлээбитэ.

 

Кини өр сылларга Майа орто оскуолатыгар математика учууталынан үлэлээн бэйэтэ туспа суоллаах-иистээх, үлэтигэр бэриниилээх, ирдэбиллээх, элбэх выпуһу таһаарбыт, үөрэнээччилэр уонна төрөппүттэр билиниилэрин ылбыт биир бастыҥ кылаас салайааччыта буолбута. Оскуола, Майа сэлиэнньэтин уопсастыбаннай олоҕор көхтөөхтүк кыттара.

 

Кылаас салайааччытын быһыытынан оҕолор дьоҕурдарын сайыннарыыга болҕомтотун уурара, хас биирдии оҕотугар дьиэтигэр сылдьан төрөппүттэрин кытта кэпсэтэрэ. Бүтүн кылааһынан хомустуулларын ситиһэн, Париж куоракка тиийэн хомуска оонньоон кэлбиттэрэ.

 

22 сыл устата улахан кэлэктиип эрэлин толорон, дьон күннээҕи кыһалҕаларын быһаарсыыга идэлээх сойуус бэрэссэдээтэлин быһыытынан кэлэктииби түмэргэ элбэх сыратын биэрэн үлэлээбитэ. Икки ыҥырыыга Майа сэлиэнньэтигэр норуот дьокутаатынан талыллан үлэлээбитэ. Өрөспүүбүлүкэҕэ 2005, 2015 сылларга ыытыллыбыт “Идэлээх сойуус бастыҥ тэрилтэтэ” күрэххэ кыттан бастыыры ситиспитэ. Бастыҥ үлэлээх профком лиидэрин быһыытынан Аммаҕа, Намҥа, Дьокуускайга сэминээрдэргэ бастыҥ уопутун атастаспыта.

 

Ийэбит таһаарыылаах үлэтэ үрдүктүк сыаналаммыта: РФ Уопсай үөрэхтээһинин бочуоттаах үлэһитэ, СӨ норуот үөрэҕириитин туйгуна, РФ Үөрэҕин министиэристибэтин Бочуотунай кыраамататынан, “Сүрэхпин оҕолорго аныыбын” диэн СӨ вице-бэрэсидьиэнэ Е.И. Михайлова анал бэлиэтинэн наҕараадаламмыта, РФ Идэлээх сойуустарын Киин Сэбиэтин “Идэлээх сойууска көхтөөх үлэтин иһин” бэлиэ аат хаһаайына этэ. “Үөрэнээччи биһирэбилин ылбыт учуутал” түөскэ кэтиллэр бэлиэни туттарбыттара, Майа сэлиэнньэтин бочуоттаах олохтооҕо аатын сүкпүтэ.

 

Василиса Кузьминична үс оҕону төрөтөн, онно эбии балтын тулаайах хаалбыт икки оҕотун иитэн, үрдүк үөрэхтээн, үлэһит, ыал оҥортоон, дьиэ-уот тэринэллэригэр көмөлөһөн ахсаабат кыһамньытын уурбута. 8 сиэн тапталлаах амарах эбэтэ этэ. Барыбытын түмэ тардара, хас биирдиибитигэр уһулуччу болҕомтолооҕо, харыстабыллаах сыһыаннааҕа, сүбэ-ама, өйөбүл, тирэх буолара. Мэлдьи кэһии тутуурдаах сылдьара. Ийэбит, эбэбит минньигэс астааҕа, дьону-сэргэни, ыалдьыты-хоноһону үөрэ-көтө көрсөр, ирэ-хоро кэпсэтэр, уруккуну-хойуккуну санаһар үтүө үгэстээҕэ. Айылҕаҕа сылдьарын, сир аһын хомуйарын олус сөбүлүүрэ, үүнээйи, оҕуруот аһын арааһын үүннэрэрэ.

 

Күндү кэргэним, ийэбит, эбэбит барахсан эн биһиги өйбүтүгэр-сүрэхпитигэр өрүү тыыннааххын. Эйиэхэ муҥура суох махтанабыт, эн үтүө ааккын үрдүктүк тутуохпут диэн эрэннэрэбит!

 

Кэргэнэ Егор Егорович, оҕолоро, сиэннэрэ.