Өйөбүл, тирэх буолар тутаах киһибит этэ

Олоҕун сыллара: 1948-2020

Подробности

Эдьиийбит

Аммосова-Николаева Екатерина Васильевна

от ыйын 4 күнүгэр уһуннук ыалдьан, хомолтолоохтук биһиги кэккэбититтэн өлөн туораата. Кини 1948 сыллаахха Дьааҥы улууһун Үҥкүр сэлиэнньэтигэр күн сирин көрбүтэ. Сартаҥ нэһилиэгэр аҕыс кылаастаах оскуоланы бүтэрбитэ. Үөрэнэр сылларыгар араас тэрээһиҥҥэ көхтөөхтүк кыттар, дуобаттыыр-саахыматтыыр, сыанаҕа ыллыыр буолан, оскуолатын чиэһин элбэхтик көмүскээбитэ. Ийэбит Слепцова Прасковья Николаевна эрдэ өлөн, аҕабыт Аммосов Василий Афанасьевич кадровай булчут буолан, тыаҕа ыраах сирдэринэн тайаан сылдьар кэмнэригэр, ийэбитин солбуйан хаалбыт баар-суох эрэнэр эркиммит, дурдабыт-хаххабыт курдук туттар киһибит буола түспүтэ. Ол курдук, биһиэхэ наар учаастак оҕолоро олорон үөрэнэллэр этэ. Ол оҕолору барыларын көрө-истэ, бэрийэ-дьаһайа сылдьыы, дьиэ үлэтин кэмигэр толоруу, хонтуруоллааһын – барыта кини ыйыытынан-кэрдиитинэн этэҥҥэ бүтэн-оһон иһэрэ.

Салгыы Дьокуускайга кэлэн биэлсэр-окусуор идэтин ылан, 1968 сыллаахха Дьааҥыга, аҕабыт төрөөбүт нэһилиэгэр Барылас биэлсэр-окусуор пуунугар сэбиэдиссэйинэн үлэлии кэлбитэ. Уонунан көстөөх сирдэргэ атынан айаннаан тиийэн, ыарыһах дьоҥҥо суһал көмөнү оҥоруу, дьахтары төрөтүү кини эт санныгар сүктэриллибитэ элбэх этэ. Бырааппыт Афоняҕа уонна миэхэ таҥаспытын-саппытын бэйэтэ тигэн, булан-талан улаатыннартаабыта, унтууну, бэргэһэни да тигэр буолбута, таҥнар таҥаһы эппэккин даҕаны.

1970-1980 сылларга төрөөбүт Дьааҥытыгар Адыаччы, Эһэ Хайа, Оһохтоох диэн уһук кырыы турар учаастактааҕы балыыһаларга, Арыылаах балыыһатыгар үлэлээбитэ. Тустаах үлэтин таһынан, араадьыйанан профилактическай ис хоһоонноох биэриилэргэ кыттара, сан-бүлүтүөннэри, эркин хаһыаттары таһаарара, уус-уран самодеятельноска кыттыы эбээһинэс кэриэтэ этэ.

1980 сыллаахха, быраас кэргэнэ Николаев Афанасий Петрович ийэтэ өлөн, кэргэнин аҕатын аахха көмө буолаары, эдьиийбит дьиэнэн Дьокуускайга көһөн кэлбиттэрэ. Кинилэргэ тыа дьоно элбэхтик кэлэр-барар, хонор-өрүүр, дьиэлэнэн олорор буолбуттара. Атын да кыһалҕалаах дьоҥҥо элбэхтик көмөлөспүттэрэ, сүүрбүттэрэ-көппүттэрэ.

1980 сыллаахха Дьокуускайга Сайсары поликлиникатыгар окусуорунан үлэҕэ киирбитэ.

1984-1987 сылларга өрөспүүбүлүкэтээҕи наркологическай дьыспаансырга сиэстэрэлээбитэ.

1988-1991 сылларга өрөспүүбүлүкэтээҕи килииньикэ балыыһаҕа ыстаарсай сиэстэрэнэн үлэлээбитэ.

1991-1994 сылларга Оҕо медицинскэй холбоһугар биэлсэрдээбитэ

1994-2001 сылларга өрөспүүбүлүкэтээҕи психоневрологическай дьыспаансырга ыстаарсай медсиэстэрэ эбээһинэһин толорбута.

2004-2016 сылларга «Умка» диэн оҕо уһуйааныгар ыстаарсай медсиэстэрэнэн үлэлээбитэ.

Эдьиийбит түүҥҥү дьуһуурустубаҕа да сылдьааччы, балтараа ыстаапкаҕа да үлэлээччи. Бүттүүн 50 сыл мэдиссиинэ ыстаастаах этэ.

Кини олоҕун уоллаах кыыһа уонна икки сиэнэ утумнууллар.

Кини биһиэхэ олохпутун-дьаһахпытын сүрүннүүр, өйөбүл, тирэх буолар тутаах киһибит этэ.

Эдьиийбит кинигэни, хаһыаты утумнаахтык ааҕара, дьону-сэргэни кытта мэлдьи алтыһан, санаа атастаһара, сүбэ-ама буолара, араас интеллектуальнай күрэхтэргэ кыайан, бириис ылан биһигини үөрдэрэ. Үлэтигэр уһулуччу бэриниилээҕинэн, учаскыабай балыыһаларга сэбиэдиссэйинэн олорон, хаста да социалистическай куоталаһыы кыайыылааҕа буола сылдьыбыта.

Олус сэргэх киһи этэ.

Балта Аммосова Розалия Васильевна,

быраата Аммосов Афанасий Васильевич.