Биhиги кэккибититтэн 2020 сыл бэс ыйын 2 күнүгэр тапталлаах оҕобут, кэргэним, аҕам, убайбыт, бырааппыт, сиэн бырааппыт

Соловьев Константин Максимович

уhун, ыарахан ыарыыттан баара-суоҕа 43 сааhыгар күн сириттэн күрэннэ.

Күндү киhибит кылгас олоҕун туhунан ахтан-санаан ааhыахпытын баҕарабыт.

Костя 1976 сыл от ыйын 20 күнүгэр Нам улууhун Үөдэй нэhилиэгэр Соловьевтар дьиэ кэргэннэригэр бастакы оҕонон күн сирин көрбүтэ. Оҕо сааhа Нам улууhун Хамаҕаттатыгар, Үөдэйигэр ааспыта.1993 сыллаахха Үөдэй орто оскуолатын бүтэрэн баран, Сэбиэскэй аармыйа кэккэтигэр ыҥырыллыбыта, сулууспатын кэмигэр Чечня сэриитигэр Хотугу Осетияҕа Моздок куоракка РФ сэбилэниилээх күүстэрин дьайыытыгар кыттан артиллерийскай пуолкаҕа сулууспалаабыта. Онно младшай сержант сыбаанньалаах отделение хамандыыра этэ. Кэлин Чечня сэриитин бэтэрээнэ буолан, кыра да буоллар, биэнсийэ ылара.

1996 сыллаахха дойдутугар этэҥҥэ эргиллэн кэлбитэ.

Дойдутугар кэлэн үлэтин ГАИ иниспиэктэринэн саҕалаабыта. Онтон Намнааҕы 2-с нүөмэрдээх СПТУ-га үөрэнэр, бэйэтэ сөбүлээн пуобар идэтин баhылаабыта. Пуобарынан Нам бөhүөлэгин «Эҥсиэли», Дьокуускай куоракка ССТХА остолобуойугар үтүө суобастаахтык үлэлээбитэ. 2008 сыллаахха ыал буолбута. Олоҕун тиhэх күннэригэр диэри Хатастааҕы орто оскуолаҕа остуорас-охранник сулууспатын үлэhитэ этэ. Үлэлээбит кэлэктииптэрин дьоно-сэргэтэ,бииргэ үөрэммит табаарыстара биhиги Костябыт холку-сэмэй, сымнаҕас майгытын бэлиэтииллэрэ.

Бииргэ төрөөбүт бырааттарыгар өрүүтүн холобур буолара. Оҕотун үөрэхтээх, үлэhит киhи буола улаатарыгар өрүү баҕарара, аймахтарын, табаарыстарын дьоро күннэригэр ас амтаннааҕын астаан, көмөлөhөн, дьон махталын ылыан ылара.

Дьоҥҥо барытыгар амарах, үтүө сыhыана барыбыт сүрэхпитигэр баар буолуо, күндү оҕобутун, чугас киhибитин өрүү сылаастык ахта-саныы сылдьыахпыт, эн биhиги сүрэхпитигэр мэлдьитин тыыннаах буолуоҥ.

Аҕата, бырааттара, кэргэнэ, кыыhа, аймахтара.