Сүрэхпитигэр өрүү тыыннааххын
- Олоҕун сыллара: 1961-2020
- Подробности
эмискэ ыарахан ыарыыга ылларан, күн сириттэн күрэммитэ бу дьыл алтынньы 7 күнүгэр 40 хонуга ааста...
Егор Михайлович 1961 сыл олунньу 27 күнүгэр Мэҥэ Хаҥалас оройуонун, I Тыыллыма нэһилиэгин Лоомтука бөһүөлэгэр Яковлевтар дьиэ кэргэҥҥэ бастакы оҕонон күн сирин көрбүтэ. Оҕо сааһа Лоомтукаҕа ааспыта.
Төрөппүттэрбит, ийэбит Еремеева Татьяна Ивановна, аҕабыт Яковлев Михаил Егорович 1969 сыллаахха Мэҥэ Хаҥалас оройуонун Хара нэһилиэгэр көһөн киирэн олохсуйаллар. Онон убайым Хара аҕыс кылаастаах оскуолатыгар үөрэнэ киирэр, ахсыс кылааһы бүтэрэн, салгыы Майа орто оскуолатыгар үөрэнэн 1978 сыллаахха ситиһиилээхтик бүтэрэр.
1979 сыллаахха Дьокуускайдааҕы мэдиссиинэ училищетыгар үөрэнэ киирэн баран, бүтэрбэккэ, Сэбиэскэй аармыйа кэккэтигэр ыҥырыллан, ытык иэһин толоро барар.
Мин оҕо эрдэхпиттэн убайым Егор Михайлович элбэх кинигэни умсугуйан ааҕарын сөҕө көрөрүм, сааһырыар диэри соло буолла да кинигэлэрин туппутунан сылдьааччы. Киэҥ билиилээх-көрүүлээх, дириҥ өйдөөх, дьоҥҥо-сэргэҕэ көнө сыһыаннаах, бэһиэлэй майгылаах этэ. Олоҕум уустук кэмнэригэр күүс-көмө, сүбэ-ама, өйөбүл буолара.
Егор Михайлович ханнык да ыарахан үлэттэн толлон турбата, барытыгар ылсан иһэрэ. 1981 сыллаахтан Харатааҕы култуура дьиэтигэр хачыгаарынан үлэтин саҕалыыр, ол кэннэ Майаҕа райпоҕа оробуочайынан, «Якуткоммунэнерго» тэрилтэҕэ хачыгаарынан, быткэмбинээккэ атах таҥаһын улларааччынан үлэлээбитэ.
1987 сыллаахха Төҥүлүтээҕи профтехучилищеҕа үөрэнэ киирэн, элиэктирик идэтин баһылыыр.
Бу үөрэнэ сылдьан олоҕун аргыһын, Үөһээ Бүлүү Тамалакааныттан төрүттээх, Марианна Константиновнаны көрсөн, 1988 сыллаахха ыал буолан, отуттан тахса сыл бэйэ-бэйэлэрин таптаһан, өйдөһөн олордулар, түөрт кыыс оҕону төрөтөн, иитэн, үөрэттэрэн дьоһун дьон гына улаатыннардылар. Үс кыыс үрдүк үөрэх кыһатын бүтэрэн, үлэлии сылдьаллар, кыра кыыс – устудьуон, икки эмдэй-сэмдэй уол сиэннээхтэр. Саҥаспыт Марианна Константиновна – өрүү итии чэйдээх, үтүө-мааны майгылаах саха дьахтара, олоххо актыыбынай көрүүлээх, олорор «Новострой» түөлбэтин салайааччыта.
Егор Михайлович 1993 сылтан Майаҕа олохсуйан «Сельхозтехника» тэрилтэҕэ үлэлиир, бу тэрилтэ кэлин ДьУоХХ СУТ диэн ааттаммыта, манна биэнсийэҕэ тахсыар диэри үтүө суобастаахтык үлэлээбитэ. Үлэтигэр үтүөтүн иһин элбэх махтал суруктаах, кырааматалаах, «За вклад в развитие коммунального хозяйства улуса», «Ветеран ГУП ЖКХ РС (Я)» бэлиэлэр хаһаайыннара.
2018 сылтан «Чолбон» ХЭТ УК диэн тэрилтэҕэ хара ыалдьыар диэри үлэлии сылдьыбыта, түүннэри-күнүстэри үлэ ыараханыттан чаҕыйбакка дьуһуурустубалыыра, эдэрдэри үлэҕэ уһуйара.
Убайым Яковлев Егор Михайлович 1998 сылтан КПРФ биир актыыбынай чилиэнэ этэ, баартыйа сорудахтарын эҥкилэ суох толороро. Майаҕа олохсуйбут кэмиттэн нэһилиэнньэ олоҕор-дьаһаҕар актыыбынайдык кыттара, ол туоһута – «Майа дойдум барахсан» бэлиэ хаһаайына, Майа нэһилиэгин бочуоттаах олохтооҕо.
2018 сылтан КПРФ туруоруутунан Мэҥэ Хаҥалас оройуонун Сэбиэтин дьокутаатынан талыллыбыта, сиэссийэлэргэ көхтөөхтүк кыттара, баҕа санаатын этэрэ, оройуоҥҥа ыытыллар тэрээһиннэргэ актыыбынай этэ.
Киһи бу Орто дойдуга олох олороору, бэйэтин кэннэ суол-иис, өйдөбүл хааллараары кэлэр. Күндү убайым, кэргэним, аҕабыт, эһэбит Яковлев Егор Михайлович, төһө да кылгас кэмҥэ олордор, дьоллоох олоҕу олорон ааста, дьон-сэргэ убаастабылын ылыаҕын ылла, инникитин өссө да элбэх былааннаах, баҕа санаалаах этэ. Кини ситэри ситиспэтэҕин, толору олорботоҕун тапталлаах кыргыттара, сиэннэрэ салгыахтара, аатын ааттатыахтара. Күндү киһибит сүрэхпитигэр өрүүтүн тыыннаах, кини сырдык мөссүөнүн хаһан да умнуохпут суоҕа.
Чугас киһибитин сүтэрбит ыарахан кэммитигэр күүс-көмө, өйөбүл буолбут дьоммутугар барҕа махталбытын тиэрдэбит: «Майа» МТ администрациятыгар, ДьУоХХ СУТ Мэҥэ Хаҥаластааҕы филиалыгар, «Чолбон» ХЭТ УК дириэктэрэ Черкашин Владимир Коммунаровичка, Тарабукин Прокопий Прокопьевичка, ТППК «Майа» тэрилтэтигэр, бу ааттаммыт тэрилтэлэр бары үлэһиттэригэр, «Новострой» түөлбэ олохтоохторугар, ритуальнай өҥөнү оҥорооччу, ыарахан хамсык ыарыыттан куттаммакка, убайым төрөөбүт төрүт дойдутун буорун булуор диэри көмөлөспүт, сиэри-туому сүбэлээн-амалаан биэрбит Дмитрьев Илья Егоровичка уонна бары көмөлөспүт бииргэ үөрэммит, үлэлээбит үөлээннээхтэригэр, табаарыстарыгар, бары аймахтарбытыгар. Баҕарабыт эһиэхэ ыраас эйэлээх халлааны, үтүмэн үөрүүнү, дьаҥ-дьаһах ыалласпатын, дьол-саргы эрэ аргыстаныҥ.
Бииргэ төрөөбүт балта Попова Марианна Михайловна, кэргэнэ Марианна Константиновна, кыргыттара Татьяна, Калисфена, Марьяна, сиэннэрэ Иосиф, Гоша, Надежда, Василина, Радислав Поповтар, кµтµ³ттэрэ Георгий Ильинов, Алквиад Федоров, быраата Михаил Яковлев.