Ахсынньы 27 күнүгэр 95 сааһыгар күн сириттэн күрэммитинэн, дириҥ кутурҕаммытын тиэрдэбит. 

 

Нина Афанасьевна 1927 с. Сунтаар улууһугар элбэх оҕолоох холкуостаахтар дьиэ кэргэннэригэр төрөөбүтэ.

Кини Сэбиэскэй былаас атаҕар саҥа туран эрэр кэмигэр төрөөбүт буолан, саха төрүт олоҕун-дьаһаҕын, үгэстэрин, култууратын этинэн-хаанынан билэ улааппытын таһынан, үөрэххэ-билиигэ, сырдыкка-саҥаҕа олус күүстээх тардыһыылааҕа. Ол да быһыытынан, Сунтаар 1 нүөмэрдээх оскуолатын ситиһиилээхтик бүтэрбитэ, бастыҥ тэрийээччи, көхтөөх комсомол, спортсмен этэ. Ити да гыннар, Нина Афанасьевна сэрии ыар, аччык сылларын этинэн-хаанынан билбитэ. Улахан дьону кытта тэбис тэҥҥэ холкуос ыар үлэтигэр сылдьыбыта, Кыайыы уонна фронт туһугар үлэлээбитэ.

 

Нина Афанасьевна Дьокуускайдааҕы пединститут Историяҕа салаатын бүтэрэн баран, Тойбохой орто оскуолатыгар ананан, учууталлыы барбыта. Ити кэмҥэ кини Учуутал уонна Киһи быһыытынан уһаарыллан тахсыбыта. Кини сэрии кэмигэр уонна ол кэнниттэн төрөппүт болҕомтото, сылаас таптала суох хаалбыт үгүс оҕоҕо дьиҥнээх доҕор, үтүө сүбэһит, настаабынньык, сороххо иһирэх ийэ кэриэтэ күндү киһи буолбута.

 

Нина Афанасьевна сатабыллаах, ыалдьытымсах хаһаайка, дьиҥнээх Далбар Хотун, үтүө сүрэхтээх, ол эрээри ирдэбиллээх ийэ, таптыыр уонна тапталлаах кэргэн этэ. Аймах-уруу, доҕор-атас өрүү кини тула түмсэрэ. Ол да иһин кини Сунтаар улууһугар биир бастакынан хас даҕаны улахан аҕа ууһун төрүччүтүн оҥорбута. Кэлин, 2013 с., архыып, бибилэтиэкэ матырыйаалларын түмэн, биирдиилээн дьонтон ахтыылары хомуйан, история, этнография матырыйаалларын чинчийэн, "Олохпун эргитэ санаан" диэн баай ис хоһоонноох кинигэни суруйбута. Ол суруйуута өрөспүүбүлүкэ таһымыгар үрдүктүк сыаналаммыта. Ити таһынан, атын кинигэлэри эмиэ суруйбута.

 

Нина Афанасьевна олоххо көхтөөх көрүүлээх, араас дьарыктаах - хоббилаах киһи этэ. Араас тааһы, тимэҕи кэллиэксийэлиирин таһынан, иистэнэрин, таҥас кырадаһынынан кыбытан тигэрин сөбүлүүрэ. Кини үлэлэринэн Өрөспүүбүлүкэтээҕи "Симэх" галерея анал быыстапка тэрийбитэ, оттон сорох үлэлэрэ Арассыыйа уонна норуоттар икки ардыларынааҕы таһымнаах быыстапкаларга турбуттара. Кэлин Нина Афанасьевнаҕа "СӨ Норуот маастара" аат иҥэриллибитэ.

 

Нина Афанасьевна олоҕун аргыһа Моисей Иванович Герасимовы кытта сэттэ оҕону төрөтөн улаатыннарбыттара, олох-дьаһах араас эйгэтигэр ситиһиилээхтик үлэлээбиттэрэ, үлэлии сылдьаллар. Билигин сиэннэр, хос сиэннэр улааталлар. Утум - салҕанар, ситим - быстыбат.