Биирдэ элбэх оҕолоох ийэлэр ортолоругар «Азия оҕолоро» оонньууларга сыһыаннаах кэпсэтии таҕыста. Куорат суос-соҕотох паарката үлэлээбэккэ турарыттан саҕалаан, тэрээһин аһыллыытыгар уонна сабыллыытыгар киирэр билиэт сыанатыгар тиийэн хааллыбыт. Бастатан туран, улахан киһи, оҕо диэн араарыы суоҕа сөхтөрдө. Оҕотуттан, улахан киһититтэн тутулуга суох 2 тыһыынчаттан 3,5 тыһыынча солкуобайга тиийэр эбит.
Суоттанан көрбүппүт, оҕолорбутун илдьэ сырыттахпытына, чэпчэки да билиэтинэн ороскуоппут уон тыһыынчаҕа тиийэр эбит. Саатар, оҕолорго аналлаах тэрээһин буолан баран, аһыллыытыгар да, сабыллыытыгар да биир даҕаны социальнай чэпчэтии суох, «Пушкин каартата» да үлэлээбэт. Ордук элбэх оҕолоохтор бырааһынньыктан матыыһылар.
Мантан сиэттэрэн, «Азия оҕолоро» оонньуулар Бастакы бэрэсидьиэн Михаил Николаев толкуйунан үүнэр көлүөнэни успуорка тардар соруктаах ыытыллар, оҕолорго анаан тэриллэр буоллахтарына, «Успуорт бырааһынньыгар сылдьыы тоҕо төрөппүт кумааһынньыгыттан тутулуктанна?» диэн ыйытыы үөскээтэ. Дьиҥэ, бу кэмиэрчэскэй тэрээһин буолбакка, социальнай тэрээһин диэн ыстаатыстаах эбээт.
«Оонньуулары арыйыы – култуура тэрээһинэ» дуо?
Ийэлэр көрдөһүүлэринэн, оонньуулары тэрийэр дириэксийэҕэ эрийэ сырыттым. Кимэ биллибэт исписэлиис «оонньуулары үөрүүлээхтик арыйыы уонна сабыы успуорт тэрээһинэ буолбатаҕын, култуура тэрээһинэ буоларын, онон туох даҕаны чэпчэтии көрүллүбэтин» эттэ.
Кини этэринэн, хата, успуорт көрүҥнэринэн күрэхтэһиилэргэ чэпчэтии баар эбит. Мин санаабар, оннук да буоллаҕына, успуорка интэриэһэ суох, чопчу тугунан да дьарыктаммат оҕо ол чэпчэтиилээх күрэхтэһиилэргэ босхо да сылдьыбата буолуо дии? Арай, аһыллыы бырааһынньыгар сылдьан успуордунан дьарыктанар оҕолору, хамаандалары илэ көрөн, буолаары турар күрэхтэһии ухханыгар киирэн, Сахатын сирин оҕолоругар ыалдьа барыах эбитэ буолаарай?
Кэпсэппит исписэлиис стадион миэстэтэ аҕыйаҕын тоһоҕолоото. 13 тыһыынча миэстэни аҕыйах диэн сөбүлэһиэ суох курдукпун. Чэ, күрэхтэһэ кэлбит 3 тыһыынча кэриҥэ оҕону уонна тириэньэри олортоххо көҕүрүүрэ буолуо. Итинтэн аҕыйаҕа суох миэстэ үрдүкү салалта, министиэристибэ, биэдэмистибэ үлэһиттэригэр түҥэтиллэрин бары даҕаны билэ, көрө сырыттахпыт. Маны тохтотон ордубутун барытын оҕолорго түҥэтэр буол, төһөлөөх элбэх оҕо бырааһынньык дьиҥ амтанын билэн, успуорду сэҥээрээччилэр кэккэлэригэр киириэх этэй?
Онон, исписэлиис эппитин курдук, успуорт бырааһынньыга диэн ааттаах тэрээһиммит култуура тэрээһинэ буолан хаалла. Ол да иһин, атын кэлии ырыаһыттар шоуларыттан итэҕэһэ суох сыаналаах эбит. Кэлиилэргэ өссө «Пушкин картата» кэм үлэлиир буолааччы.
Тэрээһин сүрүн соругун ситэрин туһугар
« Азия оҕолоро» оонньуу Дьокуускайга аан бастаан 1996 сыллаахха, бүтэһигин 2016 сыллаахха буолбутун санатабын. Сырдыгы эрэ кэрэһэлиир ис хоһоонунан бу чахчы да Сахабыт сирин оҕото бүттүүнэ кэтэһэр бырааһынньыга буолуон сөп этэ. Ону баара, билиҥҥитэ, кыттар эрэ оҕолор уонна тэрийээччилэр эрэ кэтэһэр тэрээһиннэригэр майгынныыр.
Тэрийээччилэр иннилэригэр үүнэр көлүөнэни чахчы успуорка угуйар сорук турар буоллаҕына, уонча сылга биирдэ буолар бырааһынньыкка төһө кыалларынан элбэх оҕону сырытыннарарга кыһаллыахха сөп этэ.
Ол да буоллар, бэс ыйын 26 күнүгэр диэри бириэмэ өссө да баар. Элбэх оҕолонууну уруйдуур, дьоллоох оҕо сааһы мэктиэлиир өрөспүүбүлүкэҕэ оҕо успуордун бырааһынньыгар, оҕо саастара ааспыта быданнаабыт улахан дьон халыҥ кэккэтин буолбакка, үөрбүт-көппүт, сэҥээрбит сирэйдээх оҕо аймаҕы көрүөҕү баҕарыллар.
Төрөппүт санаатын тиэртэ Күндэли.
