Хой
Хой бу нэдиэлэҕэ саҥа доҕору булуоҕа. Ол доҕор кэлэр өттүгэр олус туһалаах-көдьүүстээх буолуон сөп. Үөрэнэргэ аһара табыгастаах кэм, ордук – эксээмэни туттарар, собеседованиены ааһар дьоҥҥо. Нэдиэлэни көрдөөх-нардаах хампаанньаҕа, элбэх дьонноох сиргэ атаара сатаа. Уопсайынан, бэһиэлэйдик сынньанарга, көрүлүүргэ үчүгэй нэдиэлэ. Харчыгын эрэ аһара матайдаамыаххын наада.
Оҕус
Күүс-кыах толору, ону туһанан бу нэдиэлэҕэ хамсаммахтаан хааларыҥ ордук буолуо. Барыс киллэриэн сөптөөх этиигэ барытыгар сөбүлэһэн ис. Бу нэдиэлэҕэ эн тус олоххун барытын оннун булларан, сааһылаан кэбиһэр сураҕы истиэҕиҥ. Санатабыт, ол сурах хайаан да “үчүгэй” диэн буолуо суоҕун сөп. Онно олоҕуран, эн саамай сөптөөх уонна бигэ быһаарыныыны ылыахтааххын.
Игирэлэр
Игирэлэр, бу үүммүт күнү-дьылы барытын дьиэ кэргэҥҥитигэр анааҥ. Барыы-кэлии, ороскуот, ону-маны атыылаһыы, хамсаабат баай-дуол боппуруостарын быһаарыы күүтэр. Быһата, үүммүт үтүө күнү-дьылы үчүгэйдик атаарыы түгэннэрэ. Үлэни-хамнаһы толорорго дьыалабыай актыыбынаһыҥ арыый тиийбэт, онон, пакаа, тохтото түс, сынньан. Дьиэ-уот, хаһаайыстыба боппуруостарынан дьарыктан.
Араак
Бу нэдиэлэҕэ араактар кэнэҕэскини былаанныыллара, оҥоһуллубут дьыалалар сөптөрүн-сөтөгөйдөрүн анаараллара, элбэҕи толкуйдууллара ирдэнэр. Араас идиэйэ бөҕө киирэр да, ону хайдах олоххо киллэрэри билиҥҥитэ билбэккит. Үчүгэйдик толкуйдааҥ, барыта бэйэтэ бэйэтигэр ыйдаҥаран, чуолкайданан кэлиэ. Эмоцияҕытын кыана туттуҥ: наһаа долгуйбутуҥ, өрүкүйбүтүҥ, үөрбүтүҥ-хомойбутуҥ дьону куттуон сөп.
Хахай
Чугас эргимтэҕиттэн ким эрэ көмө көрдөһүөҕэ. Ону эн төһө да баҕарбатаҕыҥ иһин, толорорго кыһан. Тоҕо диэтэххэ, бу нэдиэлэҕэ дьоҥҥо оҥорбут үтүө дьыалаҥ хас да бүк улаатан, ыйааһыннанан бэйэҕэр төннөн кэлэр сокуоннаах. Ол эрээри ким эрэ көрдөһүүтүн толороору, атын дьоҥҥо иэскэ кииримэ, харчы иэһээмэ. Ону кэмигэр кыайан төнүннэрбэккэ эрэйдэниэҥ.
Кыыс
Кыыс бу нэдиэлэҕэ тиритэ-хорута, умса-төннө үлэлиэхтээх. Ол үлэтэ таһаарыылаах буоларыгар халлаан сулустара бары көмөлөһүөхтэрэ. Сарсыарда эрдэттэн туран ыкса киэһээҥҥэ, өрөбүллэргэ диэри күүскэ үлэлээҥ. Күүскүт-кыаххыт онно толору эппиэттэһэр. Үлэҕитигэр кэлэр ситиһии-кыайыы эһигини өссө кынаттаан биэриэҕэ. Үлэни сарсыҥҥы күҥҥэ хаалларымаҥ, барытын күнүгэр ситэрэн-хоторон иһиҥ.
Ыйааһын
Күүтүллүбэккэ сылдьыбыт дохуот, соһуччу харчы, нэһилиэстибэ, страховка төлөбүрэ кэлэр чинчилээх. Олус табыгастаах, барыстаах усулуобуйаҕа улахан хамсаабат баайы, холобур, дьиэни-уоту, массыынаны, атыылаһыаххытын сөп. Доруобуйаҕытыгар болҕомтоҕутун ууруҥ. Кыра соҕус аһааҕырыы, ыарыы баара көстөр. Ону тута көрдөрүнэн кэбиһиҥ, баалатымаҥ.
Скорпион
Сынньанарга саамай дьүөрэлэһэр ньыма: олорор-үлэлиир балаһыанньаны уларытыы. Күн аайы уларыйбат, дэлби сылаппыт, хал гыммыт үлэттэн-олохтон ханна эрэ баран сынньаныҥ. Холобур, түмэлгэ, эрэстэрээҥҥэ сылдьыҥ, көрсүбэтэҕэ ырааппыт дьоҥҥутугар баран ыалдьыттаан кэлиҥ. Саҥаттан төрөөбүт курдук буола түһүөххүт. Арай түүннэри сылдьымаҥ уонна аһара наһаалаамаҥ.
Охчут
Элбэх охчут бу нэдиэлэҕэ бэйэтин итэҕэһин-быһаҕаһын хостуу сатыа, “мөлтөх киһи быһыылаахпын” диэн санаалар көтөн түһүөхтэрэ. Онно бэринимэҥ, киирэн биэримэҥ. Санааҕыт түстэҕинэ – ол өтөрүнэн ааһан быстыа суоҕа. Эн үтүө хаачыстыбаларыҥ итэҕэскинэээҕэр быдан элбэхтэрин өйдөө. Уопсайынан, настарыанньаҥ алдьаммытын атын дьонунан таһаарыма, дьону кытта иирсимэ, кыыһырсыма.
Чубуку
Сулустар этэллэринэн, бу нэдиэлэҕэ чубукулар иллэҥ кэмнэрин барытын дьиэ кэргэннэригэр аныыр аналлаахтар. Чугас дьоҥҥут эһигиттэн көмө-ама, сүбэ-соргу эрэйэллэр, ону сүрэҕэлдьээбэккэ толорон иһиҥ. Өрөбүллэргитигэр дьиэҕитин-уоккутун өрө тардыҥ, тупсарыҥ. Үлэҕэ-хамнаска бэйэҕитигэр улахан эппиэтинэһи ылынымаҥ. Нэдиэлэ ортотугар үлэҕиттэн хайдах курдук сылайбыккын, хал буолбуккун өйдүөҕүҥ.
Күрүлгэн
Бэлиитикэҕэ карьера оҥорорго, ханнык эрэ юридическай боппуруостарга орооһорго, идэни-үлэни уларытарга бэртээхэй күн-дьыл үүммүт. Ол барыта аһара түргэнник, судургутук быһаарыллан хаалар чинчилээх. Кэргэннээх күрүлгэннэр тус олохторун хайдах сэргэхситэллэрин туһунан толкуйданаллара наада. Ити чааһыгар кинилэр сокуоннай аҥаардарыгар сонун идиэйэ, санаа-оноо баар буолуон сөп. Сүбэлэһиҥ.
Балыктар
Сулустар кэпсииллэринэн, балыктар бэйэлэрин дьулуурдарын-дьаныардарын суотугар, былааннаабыт соруктарын-былааннарын барытын бу нэдиэлэҕэ олоххо киллэрэн кэбиһэр кыахтаахтар. Үп-харчы боппуруоһа барыта – этэҥҥэ. Урут долгута, санаа баттыга буола сылдьыбыт боппуруостар сыыйа сүтэллэр. Үлэҕитигэр балаһыанньаҕытын тупсара сатааҥ, ону туох да кыһалҕата суох ситиһиэххит.
