ГОРОСКОП. Атырдьах ыйын 29 - балаҕан ыйын 4 күннэрэ

Хой

Дьыалабыай, официальнай эйгэҕэ ситиһии күүтэр. “Ыйааһыннаах” киһи көмөтүнэн өр кыайтарбакка сылдьыбыт дьыалаҕын ыпсарыаҥ. Туһалаах, үтүө дьону кытта көрсүөҥ. Улахан суолталаах соруктары былааннан, үчүгэй үлэни булар туһунан толкуйдан. Күөн күрэскэ кыайыы дуу, бириис дуу күүтэр. Үлэҥ туһунан атын дьон истэллэрин курдук саҥара сырыт, ол эппиккин салалтаҥ улаханнык сөбүлүө.

Оҕус

Туохха барытыгар тииһинэ сатыыгын, хас да сорудаҕы тэҥҥэ толороҕун. Хоптон-сиптэн дьалты сырыт, хос санаалаах киһи кэтии-маныы сылдьар. Таптал эйгэтигэр эмиэ элбэх хамсааһын күүтэр. Эн “романтичнайгын”, бэһиэлэйгин. Өрөбүллэргэ аймахтарыҥ ыалдьыттыы кэлиэхтэрин сөп. Ол эйигин кыратык сылатыа эрээри, барыта үчүгэйинэн эрэ түмүктэниэ. Иэйиилээх сыһыан күүтэр.

Игирэлэр

Үпкэ-харчыга табыгастаах кэм үүммүт. Харчыга сыһыаннаах дьыалаҕа барытыгар күүскэ түһүнэн ис. Ол барыта кыайыыны-сүүйүүнү кытта ситимнэниэ. Биисинэскэ урут кыайтарбатах кирбиилэргин ситиһэр чинчилээххин. Настарыанньа – бэрт, дьиэҕэ-уокка сыһыан – наскыл-нуурал. Эн үтүө майгыгыттан ким эрэ олоҕо өссө тупсуо. Атыыга-тутууга, доруобуйаҕа, тас дьүһүҥҥэ барытыгар кыайыылаах нэдиэлэ.

Араак

Түргэҥҥин-тарҕаҥҥын, тугу барытын эрдэттэн курдары билэҕин. Сүрэҕэ суох уонна хаппырыыс майгылаах кэллиэгэлэр сылатыахтара. Санааҕын кыана тутун, этиһимэ, иирсээҥҥэ киирэн биэримэ. Ол туттуммутуҥ манньатыгар эйиэхэ дьол имнэниэ. Сулумах араактары таптал “фронугар” ситиһии күүтэр. Өрөбүллэргэ сонун көрсүһүүлэр баар буолуохтара. Таайан көрөр дьоҕургун, сүрэххин иһит.

Хахай

Аан дойду араас кистэлэҥнэрин арыйар, бөлүһүөктүүр, айар дьоҕур тобуллар нэдиэлэтэ. Үлэҕэр харчы бөҕөнү хоторуоҥ эрээри, ону матайдаама, мунньан ис. Эбии харчы булар ханааллары толкуйдаа. Эргиэн-урбаан, кэпсэтии барыта табыллар чинчилээх. Өссө элбэҕи кыайыаххын бытааныҥ, сэрэҕиҥ, хамсанан испэтиҥ мэһэйдиир. Таптал боппуруоһугар сэрэх-сэргэх буол, кыыһырсыы тахсыан сөп.

Кыыс

Саҥа доҕоттор туһалаах буолуохтара, карьераҕар да көмөлөһүөхтэрин сөп. Көрсүһүү, көр-нар, атыы-тутуу аһара табыллар нэдиэлэтэ. Үлэҕэр туһалаах-наадалаах быһаарыылар ылыллыахтара эрээри, дьиэ кэргэн иһигэр сыһыан мунаах соҕус. Эйиэхэ сыһыана суох иирсээҥҥэ киирэн биэримэ. Мээнэ тыллаһан баран кэлин кэмсиммэт курдук дьаһан. “Туора дьон мин тус олохпор орооһоллор” диэн кыйаханыма.

Ыйааһын

Сыһыаны буортулаабат туһугар, түбэһиэх этиһиигэ киирэн биэримэ. Кимнээх эрэ үчүгэй идиэйэлэрин ылан туһанар кыахтааххын. Өрөбүллэргэ урут кыайтарбакка сылдьыбыт сыһыан барыта тупсуо. Ил, эйэ, таптал эрэ хаалыа. Тугунан түмүктэнэрэ биллибэт дьыалаларга кыттыһыма, ыксаама, сүрэҕиҥ тугу диирин иһит. Үлэҕэр эмиэ ити судургу быраабыланы тутус. Онно-манна орооһума.

Скорпион

Үлэҕэр эппиэтинэстээхтик сыһыаннаһар кэмиҥ кэлбит. Саҥа-сонун этиилэр, уустук соруктар, дьикти түмүктээх быһаарыылар күүтэллэр. Атын дьоҥҥо, эдэр кэллиэгэлэргэ, “муммут-тэммит” табаарыстарга көмөлөһө сатаа. Ол эйиэхэ уон оччонон улаатан төннүө. Олорон хаалыма, үлэлээ. Ону “үрдүк өһүөлээхтэр” бэлиэтии көрүөхтэрэ, балаһыанньаҥ өссө тупсуо. Таптал эйгэтигэр саҥа-сонун кыах үөскүө.

Охчут

Бу нэдиэлэҕэ ким дьиҥнээх чөмпүйүөнүн, бастыҥын көрдөрүөҥ. Тугуҥ барыта табыллан иһэр. Өйгүн, кыаххын, бэйэҕэр бигэ эрэлгин көрөн конкуреннар көстөөх сиртэн куоталлар. Дьиэ кэргэн иһигэр сыһыан – ааттаах! Эргэ-урба малтан босхолон, ол оннугар саҥаны булунарга харчы да баардыҥы. Дьиэ кэргэнинэн ханна эрэ айаҥҥа бар. Өрөбүллэргэ үчүгэйдик сынньан, сылайа быһыытыйбыккын.

Чубуку

Үлэҕэр-идэҕэр ситиһии баар буолуо. Ол түмүгэр салалтаҥ эрэлэ, биһирэбилэ улаатыа. Үөр-көт, элбэхтик мичээрдээ. Улахан суолталаах дьыалабыай көрсүһүүгэ сыаналаах идиэйэни биэрэн “былааһы ылыаҥ”. Иллэҥ кэмҥэр элбэхтик хамсанан, дьарыктанан уопсай туруккун тупсар. Нэдиэлэ бүтүүтүгэр дьиэ-уот элбэх түбүгэ күүтэр. Онно сөбүн көрөн хамсан, кыайбат элбэх соруккар ылсан настарыанньаҕын алдьатыма.

Күрүлгэн

Дьэллэм-сайаҕас буолан саҥа доҕоттору булуоҥ. Бэрт дьиктитик, таптыыр киһигин өр эрэйдии сылдьыбыт боппуруос хоруйун тобулуоҥ. Тапталга – ситиһии! Уопсайынан, таптал-иэйии боппуруоһугар эргиччи табыгастаах нэдиэлэ. Дьон ортотугар сырыт, үөр-көт, күл-сал. Өрөбүллэргэ бэрт интэриэһинэй көрсүһүүлэр, үтүө сонуннар баар буолуохтара. Муоданы сырсыма, доруобуйаҕын көрүн.

Балыктар

Үлэҕэр хас да уустук сорук күүтэр. Ону тус бэйэҥ үтүө хаачыстыбаларыҥ көмөтүнэн быһаарыаҥ. Доҕотторуҥ көмөлөрүн туһан. Үлэҕэр үчүгэйдик хамсанан саҥа идиэйэлэри олоххо киллэр. Таптал сыһыаныгар бэйэҕэр эрэлиҥ улаатыа. Ити чааһыгар билииҥ-көрүүҥ кэҥиэ, хараҕыҥ арыллыа. Өрөбүллэр – таптыыр киһигин кытта көрсөргө, бииргэ айанныырга, алтыһарга бэртээхэй кэм. Барыта үүт тураан, чуумпу.