ГОРОСКОП. Балаҕан ыйын 5-11 күннэрэ

Хой

“Нэдиэлэ бастакы аҥаарыгар хой доруобуйатын туругун көрүнэрэ ордук буолуо” дииллэр. Маны тэҥэ, бу – үлэ, карьера тупсарыгар, үрдүүрүгэр табыгастаах кэм. Элбэх хамнастаах, интэриэһинэй, үчүгэй үлэ көстөн хаалыан сөп. Биллэн турар, олорон биэрбэтэххинэ, хамсаннаххына. Нэдиэлэ иккис аҥаара – онно-манна айанныырга, саҥа дьоннуун билсэргэ барсыбат кэм. Аймахтары, чугас ыаллары кытта иирсээҥҥэ киирэн биэримэ.

Оҕус

Түһүүлээх-тахсыылаах нэдиэлэ күүтэр. Тымныйыаххын сөп. Нэдиэлэ ортото – таптал, иэйии боппуруоһугар кыайыылаах кэм. Ыал оҕустар сүрэххит аҥаарын итэҕэйиҥ, таптааҥ, оччоҕо көмөлөөн ханнык баҕарар уустук боппуруоһу кыайыаххыт. Мэлдьи бииргэ буолуҥ. Нэдиэлэ иккис аҥаарыгар үпкэ-харчыга кыпчыттарыы күүтэр. Харчыгытын көрөн-истэн, өйөөн-убаан туттуҥ.

Игирэлэр

Эдэр, таптаһар игирэлэри иирсээн, кыыһырсыы күүтүөн сөп. Оннук буолбатын туһугар, таптыыр киһигитин кытта үп-харчы, дохуот-ороскуот туһунан букатын кэпсэтимэҥ. Нэдиэлэ ортотугар дьиэ кэргэн иһигэр сыһыан барыта тупсуо, орун оннугар түһүө. Үлэҕэ, үөрүүгэ барытыгар бииргэ буолуҥ, оҕуруоккутун көрүҥ, дьаһайыҥ. Чэппиэртэн саҕалаан аймахтары кытта иирсээнтэн сэрэн.

Араак

Бэнидиэнньиккэ “оҕо уонна төрөппүт” диэн тиэмэҕэ кыҥыр-хаҥыр саҥарсыы үөскүүр чинчилээх. Оптуорунньук, сэрэдэ – саамай табыллыбыт, холку-нуһараҥ күннэр. Бу күннэргэ интэриэһинэй дьону көрсүөххүт, саҥа сонуну билиэххит, тапталгытын да булуоххутун сөп. Чэппиэртэн саҕалаан айаны, саҥа билсиини тохтоппут ордук. Билбэт дьоҥҥутуттан тэйэн биэриҥ, бэйэлэрэ сырыттыннар.

Хахай

Бэнидиэнньиккэ бөрүкүтэ суох сонуну истиэххин сөп. Онно – кыһаллыма, ити сымыйа сурах. Нэдиэлэ ортото – дьиэ-уот, хаһаайыстыба боппуруоһун быһаарарга үчүгэй кэм. Харчыҥ элбэх, онон дьиэҕэ туттуллар туох эрэ туһалаах малы атыылаһан олоххун чэпчэтиэххин сөп. Дьиэни-уоту, оҕуруоту, даачаны дьаһайарга бэрт кэм. Нэдиэлэ иккис аҥаарыгар элбэх дьонноох сиргэ сылдьыбакка кыһан, улахан былааннары оҥостума.

Кыыс

Бэнидиэнньиккэ кимиэхэ да харчыны иэс биэримэ. Сүгүн төннөрбөккөлөр, онтон сылтаан иирсээн тахсыан сөп. Нэдиэлэ ортотугар айар иэйииҥ өрө көтөн тахсыа. Өр ыралана санаабыт баҕаҕын олоххо киллэрэн бар. Истиҥ иэйиилээх сыһыаҥҥа эмиэ бэрт табыгастаах кэм. Нэдиэлэ иккис аҥаарыгар бэйэҥ “быраапкын хачайданан”, улахан, кыахтаах дьону кытта иирсээҥҥэ киирэн биэримэ. Син биир кыайыаҥ суоҕа.

Ыйааһын

Салалтаҕын уонна төрөппүттэргин кытта аахсыма. Өйдөһүөххүт суоҕа. Бэйэҥ санааҕын, кырдьыккын бэйэҥ искэр тутан хааллар, онон сөп буолуо. Нэдиэлэ ортотугар үлэҕин уонна сынньалаҥҥын үчүгэйдик дьүөрэлээн туһан. Ол эн дууһаҥ уоскуйарыгар көмөлөһүө. Чэппиэртэн саҕалаан ааккын-суолгун, аптарытыаккын алдьатар моһол тоһуйуо. Онно киирэн биэрбэт туһугар, тойону-хотуну кытта тыл аахсыма.

Скорпион

Бэнидиэнньиккэ ханнык да кистэлэҥ дьыаланы былааннаама, оҥорума. Нэдиэлэ ортото айар иэйиилээх дьоҥҥо үтүө кэм. Тутулуга суох быһаарыылары ылына, урут кыайбатах үрдэллэргин ситиһэ сатаа. Биир санаалаах, идиэйэлээх дьоҥҥун кытта булустаххына, олоҕуҥ өссө интэриэһинэй буолуо. Нэдиэлэ иккис аҥаарыгар соһуччу, бэрдэ суох “сюрпризтар” күүтүөхтэрин сөп. Саарбах дьону кытта таптаһыма, хоонньоһума.

Охчут

Бэнидиэнньиккэ күүскэ хамсаныылаах күрэхтэһиилэргэ, үлэҕэ-хамнаска кыттыһыма, эчэйэн хаалыаҥ. Нэдиэлэ ортотугар аа-дьуо ньылбыйа сылдьан туруоруммут соруккун ситиһиэҥ, араас кистэлэҥ информацияны билиэҥ. Ханнык эрэ улахан аптарытыаттаах тойон эйигин өйүүр, көмөлөһө сатыыр. Нэдиэлэ иккис аҥаарыгар сүрэххит аҥаарын кытта сыһыан алдьаныа. Майгыгыт, олоҕу көрүүгүт букатын майгыннаспат дуу, тугуй?

Чубуку

Бэнидиэнньиккэ дьыалабыай партнеру эбэтэр таптыыр киһини кытта кыыһырсыы күүтэр. Ол барыта ким эрэ эрэннэрбит тылын толорботоҕуттан тахсыа. Нэдиэлэ ортото – ыра-баҕа санааҕыт туоларыгар үчүгэй кэм. Былааҥҥа киирбэтэх бэһиэлэй айан күүтэр. Оттон нэдиэлэ иккис аҥаарыгар ханна да айаннаабатаҕыҥ ордук. Сир хаба ортотугар ыалдьан хаалар куттал баар.

Күрүлгэн

Сокуону кэһии, толоостук быһыыланыы иэстэбиллээх буоларын умнума. Киһилии сиэри-майгыны тутус. Нэдиэлэ ортотугар эр санааҕын ылынан, күн анныгар миэстэ иһин охсуһан, киирсэн бар. Бэйэҥ идиэйэҕин, санааҕын туохтан да толлубакка туруорус. Куттаныма. Оттон нэдиэлэ иккис аҥаарыгар ол актыыбынаскын уҕарыт. Кутталлаах үбү эргитии, экстремальнай успуорт эйгэтигэр киирэн биэримэ. Бэйэҥ кэһэйиэҥ.

Балыктар

Чугас дьоҥҥор тулуурдаахтык сыһыаннас, өйдөһө сатаа. Ордук, истиҥ иэйии, таптал боппуруостарыгар. Нэдиэлэ ортотугар дьиэ кэргэҥҥэ сыһыаҥҥыт сааһыланыа, оннун булуо. Бу кэмҥэ эһиги ханнык баҕарар боппуруоска уопсай тылы булуоххут, өйдөһүөххүт. Тоҕоос көстүбүччэ, бу кэмҥэ эһиги дьиэ кэргэн олоҕор улахан былааннары тобулуоххутун сөп. Ол эрээри, нэдиэлэ иккис аҥаарыттан эмиэ кыыһырсан, адаарыһан барыаххыт.