Фекла Степановна Егорова 97 саастаах

1926 сыл от ыйын 1 күнүгэр Арҕаа Хаҥалас улууһун Харыйалаах нэһилиэгэр Марфа уонна Степан Федоровтар күүтүүлээх күндү соҕотох тыыннаах оҕо буолан күн сирин көрбүт. Кэлин паспорга сурулларыгар от ыйын 1 күнүнэн Орджоникидзевскэй оройуон Харыйалаах с. диэн суруйбуттар. Оҕо сааһа Харыйалаахха, Кэтэмэ Төгүрүк алааһыгар ааспыта.

Харыйалаах 7 кылаастаах оскуолатыгар үөрэммитэ. 1942 сыллаахха Ворошилов аатынан колхуоска үлэлии киирбитэ. Сайын окко, күһүн хомуурга, кыһын ийэтинээн Марфалыын Уһун Ойооско алта уонча субан сүөһүнү көрөллөрө. 1944 сыллаахха, сэрии бүтэрэ чугаһаан, РАБФАК-ка бэлэмнээбиттэр.

1945-1947 сс. Дьокуускайга РАБФАК-ка үөрэммитэ. Онтон 3 ыйдаах кууруһу ааһан, тыа сиригэр учуутал идэтин ылбыта.

1948 сыллаахтан учуутал идэтинэн үлэтин саҕалаабыта. Математика, алгебра, геометрия, онтон алын сүһүөх кылаас учууталынан 19 сыл Харыйалаах, 2-с Малдьаҕар, Тиит-Арыы оскуолаларыгар үлэлээбитэ. Онтон 11 сыл Тиит-Арыы уһуйааныгар сэбиэдиссэйдээбитэ. Ити курдук элбэх оҕону билии аартыгар уһуйбута.

1949 сыллаахха Аҕа дойду Улуу сэриитин бэтэрээнэ Егоров Николай Дмитриевиһи, кытары (1923-1983) олохторун холбообуттара. Кини сэриини илиҥҥи фроҥҥа түмүктээбитэ. Аатырбыт 1034 полканы кытары сатыы Бухэду уонна Хайлар хайаларын туораан Цицикарга тиийбиттэрэ.

Дьоллоох дьиэ кэргэн 34 сыл бииргэ олорбуттара. Егоровтар уон оҕолоруттан алтата – үөрэх-иитии үлэһиттэрэ. 2015 сыллаахха улахан кыыһа Любовь Николаевна Григорьевалыын уонна кийиитэ Нина Федоровна Егоровалыын СӨ үөрэҕириитин энциклопедиятыгар киирбиттэрэ.

1986 сыллаахтан Хаҥалас улууһун Тиит-Арыы нэһилиэгин Бочуоттаах олохтооҕо. Уонтан тахса сыл бэтэрээннэр сэбиэттэрин бэрэссэдээтэлинэн үлэлээбитэ.

Билигин Докуускай куоракка сэрии бэтэрээннэрин огдооболорун дьиэтигэр олорор. Сайын аайы дойдутугар тахсан сайылыыр. Уопсастыбаннай олоххо күүһэ тиийэринэн кыттар.

Г.В. Ксенофонтов аатынан Тиит-Арыы орто оскуолатыгар 1996 сыллаахтан Бочуоттаах меценат, сыл аайы бастыҥ үөрэнээччигэ анал истипиэндьийэ туттарар.

2020 сыллаахха өрөспүүбүлүкэ социально-экономическэй сайдыытыгар кылаатын иһин «Саха Өрөспүүбүлүкэтин Ытык сүбэтэ» бэлиэнэн наҕараадалаабыттара.

Фекла Степановна - 10 оҕолоох Герой Ийэ, Егоровтар педагогическэй династияларын төрүттээччи, үлэ, тыыл бэтэрээнэ, СӨ Ытык сүбэ бэлиэ хаһаайына, Хаҥалас улууһун Тиит-Арыы нэһилиэк бочуоттаах олохтооҕо. 23 сиэннээх, 36 хос сиэннээх, 2 хос-хос сиэннээх. Биэс оҕото уонна аҕыс сиэнэ элбэх оҕолоох ыаллар, өрөспүүбүлүкэ араас улуустарынан олороллор.

Сэҥээриилэр

+4 Григорьева Любовь Ни 09.10.2023 21:37

Ийэбит оло5ун үтүө холобурун батыьан, бары үөрэхтэнэн, үлэьит буолан, о5о-уруу тэнитэн, бүтүн Саха сирин киэң киэлитин устун тар5анан үлэлии-хамсыы сырыттахпыт. Ба5арабыт күндүттэн күндү киьибит үөрэ-көтө өссө да уьуннук, дьоллоохтук олоруон!
Улахан кыыьың, 73 саастаах хос эбээ да буоллар, билигин да о5о буола сылдьар, Кэбээйи улууьун Мукучу нэьилиэгин олохтоо5о, СӨ үөрэ5ириитин туйгуна, РФ үөрэ5ириитин бочуоттаах үлэьитэ Любовь Николаевна Григорьева.

Ответить

+1 Гелена 10.10.2023 11:53

♥♥♥

Ответить

+2 Архипова Екатерина 11.10.2023 20:26

Я являюсь именной стипендиаткой педагогической династии семьи Егоровых за текущий год .Семья Егоровых ежегодно выбирают одного ученика ,который за этот год достиг высоких результатов по учебе и ввел активную жизнь Тит-Аринской школы.

Ответить

+1 Фекла Варламова 13.10.2023 20:46

Фекла Степановна дьоьун оло5унан барыбытыгар холобур буолар. Улахан дьиэ кэргэн эбээтэ, хос эбээтэ, ытык кырдьа5аспытыгар кытаанах доруобуйаны ба5арабыт!

Ответить

Обновить список комментариев

Киир

Фекла Степановна Егорова 97 саастаах

Сэҥээриилэр

Санааҕын суруй