Егор Федорович Тимофеев 95 саастаах
-
-
1928 сыл балаҕан ыйын 28 күнүгэр I-Тыыллыма нэһилиэгин Хомпу бөһүөлэгэр төрөөбүтэ. Хаптаҕай, Россолуода быыһыгар Ворошилов колхуоска олорбуттар. Тулаайах хаалбыт, ийэ, аҕа тапталын билбэтэх икки саастаах оҕону, уол оҕолоро суох буолан, Федор Федорович, Анастасия Яковлевна Тимофеевтар дьиэ кэргэн иитэ ылбыттар. Онтон Василий Федорович диэн уол кэлбит. Онон бииргэ төрөбүт ахсыалар. Бииргэ олорбут, иитиллибит дьонун олох хаан уруу төрөөбүт курдук саныыр.
Хаптаҕай оскуолатын сэттис кылааһын 1947 сыллаахха бүтэрбитин кэннэ өрүстэн Ломтукаҕа көһөн тахсыбыттар. Ииппит аҕата Федор Федорович 1943 с. Хомпуга олорон өлбүт.
Егор Федорович сэттэ кылааһы бүтэрбитин кэннэ Молотов колхуос үлэһитэ буолар. 1951-1954 сс. аармыйаҕа ыҥырыллан, Кытай кыраныыссатыгар зенитнэй чааска сулууспалаабыта. 1954 с. младшай сержант званиелаах эргиллэн кэлэн, Ломтукаҕа Сталин аатынан колхуоска сүөһү уонна хонуу биригэдьииринэн үлэлиир. 1948 сылтан Сталин аатынан холкуос чилиэнэ. Ол кэмнээҕи дьон бары улахан дьаныардаах туруу үлэһит, тыа хаһаайыстыбатын оҥорон таһаарыытыгар, дьон олоҕо-дьаһаҕа тупсарыгар элбэх сыраны биэрбит дьон буолаллар.
1965 с. Ленин уонна Сталин колхуостар холбоһон, Ленин аатынан колхуос буолаллар. Егор Федорович, 1959-1960 сс. автошколаҕа үөрэнэн суоппар идэтин ылан, колхуоска легковой массыынаҕа үлэлээн дириэктэрдэри, зоотехниктары, исписэлиистэри тиэйэр суоппар буолбута. Үрдэтинэн, 1972 с. бастакы кылаастаах суоппар аатын ылбыта. Үлэ тыыл бэтэрээнэ, Саха сирин автомобильнай транспорын бочуоттаах үлэһитэ. Нэһилиэк бочуоттаах олохтооҕо аат иҥмитэ.
1993 сылтан бочуоттаах сынньалаҥҥа олорор. Онуоха диэри солбуллубат суоппарга сөбүлээн үлэлээбитэ. Бу да олордор, күн солото суох, тиэргэнигэр биир кэм хамсана сылдьар, тустаах үлэтин барытын дьаһанар.
Кини кута-сүрэ, таҥарата – кэргэнэ Мария Саввична буолар. Кинилэр 1965 сыл алтынньы 25 күнүгэр холбоһон ыал буоларга сананаллар. 1968 сыл балаҕан ыйын 18 күнүгэр кэргэннии буоларга бэлиэтэнэллэр. Тимофеевтар үс оҕо амарах аҕата, иһирэх ийэтэ, элбэх сиэн эйэҕэс эбээтэ, эһээтэ, хос эһээтэ, хос эбээтэ буолаллар. Өр сылларга тыа сиригэр олорбут ыал быһыытынан сүөһү иитэн, дьиэлэнэн-уоттанан, үлэлээн-хамсаан, Ытык саастарыгар диэри олорон, олох дьолун билбит дьон диэн сыаналыыбыт.
Быйыл 95 сааһын томточчу туолбут күндү аҕабытыгар, эһээбитигэр, хос эһээбитигэр кырдьыыга бэриммэккэ өссө да чэгиэн-чэбдик, сэргэхтик сылдьаргар баҕарабыт.
Санааҕын суруй