Тимофеева Ульяна Терентьевна 93 саастаах
-
-
1930 с. балаҕан ыйын 10 күнүгэр, билиҥҥинэн Тамалакаан нэһилиэгэр Ыйыласка колхуостаах дьиэ кэргэнигэр тѳрѳѳбүтүм. Тѳрѳппүттэрим эрдэ ѳлѳннѳр, бырааппыныын тѳгүрүк тулаайах хаалан, эһэлээх эбэбитигэр оскуолаҕа киириэхпитигэр диэри иитиллибиппит.
1939-1941 сс. Ороһу 7 кылаастаах оскуолатыгар үѳрэммитим. Бастакы кылааска Васильев Капитон Николаевич, иккискэ Антонова Христина Михайловна, үһүскэ Тарасова Ольга Андреевна диэн бэртээхэй учууталларга үѳрэммитим.
Yѳһээ Бүлүү 7 кылаастаах оскуолатыгар 1941-1946 сс. үѳрэнэн 7 кылааһы бүтэрбитим. Сэрии сыллара буолан, бэйэм кѳлүѳнэм оҕолоруттан ордуга суох этим.
1946-1950 сс. БПУ (4 сыл үѳрэхтэнии олохтоммута) бүтэрбитим. 1953-1959 сс. СГУ естественнэй факультетын кэтэхтэн үѳрэнэн бүтэрбитим.
1950-1950 сс. Далыр, Ороһу, Тойоку 7 кылаастаах оскуолаларыгар биология, химия, география учууталынан үлэлээбитим. Сүрүн үлэм таһынан 10 сыл пионер баһаатайынан, хомсомуол кэмитиэтин бюротун чилиэнинэн, кылаас салайааччытынан үлэлиирим.
1961-1963 сс. Yѳһээ Бүлүү районотун сэбиэдиссэйинэн, 1964-1980 сс. райсовет иниспиэктэринэн, 1980-1984 сс. райсовет исполкомун бэрэссэдээтэлин солбуйааччытынан үлэлээбитим. Онтон 1984 с. доруобуйабынан босхоломмутум.
1984-1997 сс. районо мэтэдьииһинэн, иниспиэктэринэн үлэлээбитим.
Биэнсийэҕэ тахсан баран, 1997-2006 сс. Норуот педагогикатын ассоциациятын улуустааҕы салаатын сэбиэтин бэрэссэдээтэлинэн үлэлиибин.
1948 с. хомсомуолга,1964 с. ССКП чилиэнин быһыытынан араас ѳрүттээх уопсастыбаннай үлэни, ол иһигэр 40 тахса сыл пропагандиһынан, лекторынан үлэлээбитим. Уһун сылларга оройуоннааҕы дьахталлар сэбиэттэрин чилиэнинэн үлэлэспитим. Ити олус дьикти күүрээннээх сыллар этилэр. Эдэр сааһым хомсомуолу кытта сибээстээх буолан буоллаҕа.
1971-1974 сс. ССКП уобаластааҕы чилиэнигэр хандьыдаатынан талыллан, баартыйа РК бюротун чилиэнинэн, партийнай хамыыһыйа уонна ревизком бэрэссэдээтэлинэн үлэлээбитим.
1997-2005 сс. сыллата тоҕус тѳгүл К.С. Чиряев аатынан оҕону дьиэ кэргэҥҥэ иитии араас боппуруостарын хабан ааҕыы ыытыллыбыта. Онуоха 311 киһи кыттыбыта, сэттэ төгүл ыытыллыбыт региональнай ааҕыыларга 100 тахса киһи уопута тарҕаммыта. Ыччаты үѳрэтии, иитии, тѳрѳппүтү кытта үлэ боппуруостарыгар үгүс ахсааннаах ыстатыйалар суруллубуттара.
Үлэм улахан сыанабылы ылбыта: «СӨ үѳрэҕириитин үтүѳлээх үлэһитэ» ССРС, РСФСР үѳрэҕэриитин туйгуна, «Учууталлар учууталлара», СӨ үөрэҕин ситимин Бочуоттаах бэтэрээнэ, «Социалистическай үлэ кыайыылааҕа», «Гражданскай килбиэн» диэн бэлиэлэринэн уонна мэтээллэринэн: «1941-1945 сс килбиэннээх үлэтин иһин» , «Yлэ бэтэрээнэ», «Ленин тѳрѳѳбүтэ 100 сылыгар үлэҕэ ситиһиитин иһин», Бочуотунай грамоталарынан, «Улуус Бочуоттаах олохтооҕо» диэн сүдү аат иӊэриллибитэ.
Санааҕын суруй