Дария Гаврильевна Семенова (Егорова) 96 саастаах
-
-
1927 сыл муус устар 1 күнүгэр Мэҥэ-Хаҥалас улууһун Чыамайыкы нэһилиэгэр төрөөбүтүм. Ийэм – Егорова Марфа Яковлевна, Өнньүөстэн төрүттээх Александровтар кыыстара, аҕам – нэһилиэк олохтооҕо Егоров Гаврил Николаевич. Бииргэ төрөөбүт алтыа этибит: түөрт кыыс уонна икки уол. Сэрии иннинэ биһигини үөрэттэрээри, Амма Солобуодатыгар көһөн киирбиппит. Хабырыыс уонна Ньукулай диэн бырааттарбыт ыалдьан Аммаҕа өлбүттэрэ.
1942 сыллаахха аҕабытын сэриигэ ыҥырбыттарын кэннэ, быраата Маппый Чыамайыкыга төттөрү көһөрөн аҕалбыта. Ийэбит «Ворошилов» аатынан колхуоска араас үлэҕэ үлэлээбитэ. Биһиги кыргыттар сайын окко үлэлиирбит. Аҕабыт армияттан 1946 с. кэлэн баран «Молотов» колхуоска бэрэссэдээтилинэн, хонуу биригэдьииринэн үлэлээбитэ.
Сэрии кэмигэр 1942с. “Ворошилов” аатынан колхуоска араас үлэҕэ үлэлээбитим. Кырдьаҕас дьону кытта тэҥҥэ үлэлиирим. Ас-таҥас кэмчи этэ. Суоратынан, иэдьэгэйинэн аһыырбыт, күҥҥэ 400 гр. лэппиэскэ биэрэллэрэ. Миин олох испэт этибит. Сарсыарда эрдэттэн киэһэ хойукка диэри сылдьарбыт. Сэрии сылларыгар тыылга үлэлээбит киһи буоларбынан, үлэ, тыыл бэтэрээнэбин.
1949 с. Семенов Егор Павловичка кэргэн тахсан ыал буолбутум. Кэргэмминээн 35 сыл эйэ дэмнээхтик, дьоллоохтук олорон, тоҕус оҕону төрөтөн, иитэн, үөрэттэрэн үлэһит оҥордубут. Бары билигин убаастанар ыаллар, элбэх оҕолоохтор, үлэлии-хамсыы сылдьаллар, бэйэлэрэ эһээлэр-эбээлэр.
Бастакы оҕобут Аанчык 1950 с. олохтоох балыыһаҕа төрөөбүтэ. Иккис оҕо Байбал 1951 с. күһүн эмиэ манна төрөөбүтэ. 1953 с. саас Дьөгүөр уол төрөөбүтэ. Бу сылларга Чобурҕас диэн фермаҕа олорбуппут. Мин асчытынан, аҕабыт биригэдьииринэн үлэлээбитэ. 1954 с. саас уол оҕо төрөөн Дайыыл диэн эһэтин аатын ылбыта.
Бойуот сайылыгыттан улахан дьиэни 1955 с. көһөрөн аҕалбыттара. Сайын бэс ыйыгар Марфа диэн эбэтин аатын ылбыт кыыс күн сирин көрбүтэ. 1957 с. саас кус саҕана Мотуруона диэн аҕатынан эбэтин аатын ылбыт кыыс төрөөбүтэ. 1959 с. саас ыам ыйын 20 күнүгэр Тамара диэн эдьиийин аатын сүкпүт кыыс күн сирин көрбүтэ. 1961 с. ыам ыйыгар Арыппыан диэн аатынан сүрэхтэммит кыыс төрөөбүтэ.
Бу оҕолор бары олохтоох балыыһаҕа биэлсэр Филиппова Ирина Николаевна кыһамньылаах илиитин иһинэн төрөөбүттэрэ. 1964 с. Хабырыыс диэн ааттаммыт уол Аммаҕа төрөөбүтэ. Бу кэмнэргэ асчытынан, ыанньыксытынан үлэлээбитим. 1965 с. сайын Ходуһалаах сайылыгар үлэлии сылдьан ыалдьан охтон, Майаҕа биир ый, онтон куоракка эмтэнэн, устунан 2-с группалаах инбэлиит оҥорбуттара. Кыра биэнсийэҕэ тахсан, билиҥҥээҥҥэ диэри улахана суох биэнсийэни ылабын.
Нэһилиэкпит салалтатын улахан туруорсуутунан, 1963 сыллаахха Чыамайыкыбыт Мэҥэ-Хаҥалас оройуонугар көспүтэ. Аҕабыт, өрүү араас салайар үлэҕэ үлэлээн, дьиэтигэр хонор хоноһо этэ. Сотору-сотору мунньах бөҕө буолара. Тойон-хотун бөҕө хонон, өрөөн ааһара, олору аһатыы-сиэтии түбүгэ элбэх этэ. Өрүү дэлэй астаах, дьону үөрэ-көтө көрсөрбүт, аҕабыт үлэтигэр кынат буоларбыт. Аҕабыт үлэтинэн үрдүк ситиһиилэри дабайарыгар күүс-көмө буоларбыт.
Мин нэһилиэк ыытар үлэтигэр көхтөөхтүк кыттарым. Мэҥэ-Хаҥалас улууһун Чыамайыкы нэһилиэгин Бочуоттаах олохтооҕобун, “Ытык Ийэ” бэлиэ, “Ийэҕэ албан аат” I, II, III истиэпэннээх мэтээллэр, “СӨ Ытык кырдьаҕаһа” бэлиэ хаһаайыннара буолабын.
Күн бүгүнүгэр диэри оскуоланы бүтэрэр оҕолорго туйгун үөрэхтэрин иһин, оскуола, нэһилиэк олоҕор көхтөөх кыттыыларын иһин аҕабыт Семенов Егор Павлович аатынан истипиэндьийэ туттарабыт.
9 оҕолоохпун, 26 сиэннээхпин, элбэх хос сиэннээхпин. Чугас дьонум, оҕолорум, сиэннэрим, хос сиэннэрим тапталларыгар уйдаран, дьоллоохтук олоробун.
Санааҕын суруй