Анаабыр улууһун Улахан Бегичев арыытыгар олохсуйбут 25 овцебыгы Магадаан уобалаһыгар биэриэхтэрэ. Магаданнар туруорсууларын Саха сирин Бырабыыталыстыбата өйөөбүт. Бырйыагы олоххо киллэрии Айсен Николаев тус хонтуруолугар сылдьар.
Маныаха үбүлээһини барытын Магадантан судаарыстыба-чааһынай дьон кыттыһыыларын ньыматынан инвестордар уйунуохтара.
Магадан уобалаһын күбүрүнээтэрин эбээһинэһин быстах кэмҥэ толорооччу Сергей Носов Магадан куоратыттан 58 км ыраах сытар, Охотскай муора Завьялово арыытыгар туристыыр базаны тутарга сорудахтаабыта. Онно Анаабыртан 25 овцебык тиийэн олохсуйуоҕа. Арыыны Саха сирин учуонайдара чинчийэн баран, табыгастаах диэн быһаарбыттар.
Билигин Москуба, Магадан, Саха сирин учуонайдара Улахан Бегичев арыыга көттүлэр.
