Биир үтүө сарсыарда, буоларын курдук үөрэн-көтөн, үлэлии-хамныы, уопсастыбаҕа туһалыы, тиэтэйэ-саарайа сүүрэн иһэн, хайа эрэ «чиччик» сидьиҥ санаатын сиэртибэтэ буола сыһыы саамай куһаҕан түүлгэ көстүөн сөбө буолуо. Ону баара, маннык түбэлтэ 42 саастаах дьахтарга олунньу 3 күнүгэр илэ буолан ааста.
Ол курдук, кини 35 №-дээх оптуобуһу куоттаран баран Хабаров уулуссатыгар турар тохтобулга тиийбит. Ол кэмҥэ кэнниттэн хара курткалаах эр киһи сүүрбүт. «Эмиэ хойутаан иһэр буоллаҕа» диэн дьахтар маҥнай аахайбатах. Арай ол киһитэ ситэн кэлэн кэнниттэн бобо туппут. Дьахтар араастаан босхолоно, ыһыытыы сатаабыт да, «чиччик» өссө күүскэ ыга туппут, онтон сиргэ суулларан түһэрэн баран уҥа тоҥолоҕунан сирэйин сиргэ баттаабыт, айаҕын саба туппут.
Арыгына аҥкылыйар «чиччик», дьахтары саҥарбат оҥорон баран, ханна эрэ соһо cатаабыт. Ол кэмҥэ аттыларынан, дьахтар дьолугар, куттаҕаһа суох эр киһи ааһан иһэр эбит. Кини кыттыспытыгар дьахтар тута «чиччик» илиититтэн босхоломмут. Онтон сиргэ түһэрбит суумкатын ылан маҕаһыын диэки сүүрбүт. Дьахтар этэринэн, полицияны улахан эрэйинэн үһүстээн эрийэн ыҥырбыт (?).
Cуһал көрдүүр тэрээһин түмүгэр, дьахтарга саба түспүт 34 саастаах Дьокуускай куорат олохтооҕун, мэдиссиинэ үлэһитин туттулар. Кини полиция доппуруоһугар «итирик туруктаах сылдьыбытын, дьахтары кытта билсэ сатаабытын, аккаас ылан баран күлүгээнниир соруктаах саба түспүтүн» эттэ уонна хаһан да итинник быһыыланыа суох буолла.
Ити курдук, үгүс буруйу оҥорооччу итирик туруктаах сылдьыбытын буруйу оҥорууга сымнатар төрүөт курдук санаан туһана сатыыр. Оттон Холуобунай кодекс 63 ыстатыйатын 1.1 чааһынан итирик туруктаах сылдьан буруйу оҥоруу төттөрүтүн буруйу ыаратан биэриэхтээх - өскөтүн буруйдаах оҥорбут дьайыытынан уопсастыбаҕа кутталы үөскэтэр буоллаҕына.
Эһиги санааҕытыгар, дьахтарга маннык сидьиҥник саба түһээччи уопсастыбаҕа төһө кутталлааҕый уонна туох миэрэҕэ тардыллыахтааҕый?
Бэйэ кэр.
