Киирии

Киирии

Олунньу 19 күнүгэр Аҕа Дойду сэриитин кыттыылааҕа, Уус Майда улууһун бочуоттаах олохтооҕо Евгения Демьяновна Дульчевская 100 сааһын туолар. Ил Дархан Егор Борисов ытык кырдьаҕаһы “Үйэ саас” бочуот бэлиэтинэн наҕараадалыыр туһунан уураахтаата.

Үйэлээх үбүлүөйүн бэлиэтиир Евгения Демьяновна Белоруссия Гродно уобалаһыгар төрөөбүтэ. Сэрии иннинэ “Родина” холкуоска звено салайааччытынан үлэлээбит. Голынка дэриэбинэҕэ фашистар кимэн киирбиттэригэр бартыһааннар этэрээттэригэр киирэн связнойунан сылдьыбыта. Сэрии кэнниттэн төрөөбүт холкуоһугар үлэлээбитэ.

1953 сыллаахха Саха сиригэр көһөн кэлбитэ, Ыныкчааннааҕы Продснаб эргиэн салаатыгар харабынайынан, оробуочайынан, оһох оттооччунан үлэлээбитэ. Кэлин Уус Майда авиапордун остолобуойугар, Продснабка, райпромкомбинакка араас хара үлэлэргэ үтүө суобастаахтык эҥкилэ суох үлэлээбитэ.

1999 сыллаахха “Үлэ бэтэрээнэ” бэлиэ бэриллибитэ. Ити сыл архыып докумуоннарыгар олоҕуран “1941-45 сс. Аҕа Дойду сэриитин кэмигэр килбиэннээх үлэтин иһин” мэтээл туттарыллыбыта. Онтон 2010 сыл олунньутугар СӨ байыаннай комиссариата "Аҕа Дойду сэриитин бэтэрээнэ" дастабырыанньаны туттарбыта.

Евгения Демьяновна төһө да сааһырдар, улуус, бөһүөлэк олоҕор көхтөөхтүк кыттар, биир дойдулаахтарын убаастабылыгар сылдьар. Билигин Уус Майдаҕа олорор, кинини социальнай харалта үлэһитэ көрөр-истэр. Сыл ахсын Санкт Петербурга олорор кыыһыгар кыстыы барар уонна саас ахсын ахтылҕаннаах иккис төрөөбүт дойдутугар эргиллэр.

Тарҕат:

Ырытыыгын суруй

Защитный код
Обновить

Бүтэһик сонуннар