Бүтүн аан дойдуга өрөспүүбүлүкэ аатын чиэстээхтик көмүскүүр, “Zavod” үҥкүү бөлөҕүн туһунан истибэтэх төрөппүт, оҕо, ыччат аҕыйаҕа буолуо. Бу бөлөҕү Ньургуйаана Яковлева кэргэнэ Андрей Степановтыын салайаллар. Кинилэр иитиллээччилэрэ Диана Егорова – Lil Di Саха гимназиятын 8-с кылааһын үөрэнээччитэ. Тус ситиһиитинэн үгүс киһиэхэ үтүө холобур буолар. Аныгы кэм чаҕылхай үҥкүүһүтүн кытары кэпсэтиибитин сэргээҥ.
Чыпчылҕан ыйытык
Дьыл кэмэ: саас
Дьүһүнэ: хара, маҥан, фиолетовай, сырдык розовай
Киинэ жанра: комедия, фантастика уонна ужас
Бүлүүдэ: ийэм астаабыт “мясо по-французски” этэ
Бэйэни көрүнүү: күннээҕи олохпор таҥаска-сапка боростуой истииллээхпин, сирэйбин-харахпын кырааскаламмаппын.
– Диана, төрөппүттэриҥ, дьиэ кэргэниҥ туһунан кэпсии түспэккин ээ...
– Мин Егоровтар дьиэ кэргэннэригэр иккис оҕонон күн сирин көрбүтүм. Ийэм Александра Кононовна, аҕам Лазарь Мирославович үс оҕо амарах төрөппүттэрэ. Эдьиийдээхпин уонна кырачаан балтылаахпын. Ийэм – Чурапчыттан, аҕам Кэбээйиттэн силис тардыылаахтар. Ийэм – талба талааннаах иистэнньэҥ, оттон аҕам газовик идэлээх.
– Тута ыйытабын: төрүккэр үҥкүүһүттэр бааллар дуо?
– Дьиибэ эрээри, аймахтарым, чугас дьонум үҥкүүттэн отой тэйиччи эйгэҕэ үлэлии-хамсыы, айа-тута сылдьаллар.
– “Zavod” үҥкүү бөлөҕөр хас саастаах сылдьан кэлбиккиний?
– Бу бөлөххө эмискэ баҕайы ийэм аҕалбыта. Оччолорго 8 саастаах этим. Кылааһынан хомуска оонньуу Парижка айаннаары сырыттахпытына, учууталым “анараа тиийэн үҥкүүлээр” диэн сорудахтаабыта. Биһиги кылаас бары хомус алыптаах тыаһыгар уйдаран, хомуска оонньуубут. Онуоха ийэм миигин үҥкүүгэ үөрэттэрэ диэн, анаан-минээн “Zavod”-ка аҕалбыта. Дьэ, бу кэмтэн ыла барыта саҕаламмыта.
– Ол аата эрдэттэн үҥкүүлүүр буоллаҕыҥ?
– Интэриниэттэн көрөн хамсаныылары үөрэтэр этим.
– Ээ, сөп. Бу бөлөххө дьарыктанар кэмҥэр сири-сибиири бараатыҥ, балай эмэ кыайыы-хотуу үктэллэнниҥ дии...
– Аныгы хип-хоп үҥкүү Арассыыйатааҕы чөмпүйэнээттэриттэн саҕалаан, Эмиэрикэҕэ тиийэ айанныыбыт. Бу бөлөххө киирэн баран, эһиилги сылыгар Эмиэрикэҕэ ыытыллыбыт улахан бэстибээлгэ кыттыбыппын тоҕо эрэ наһаа истиҥник саныыбын. Арааһа, бастакы улахан ситиһиим буолан буолуо... Араас таһымнаах, талааннаах дьону кытары алтыһар, кинилэртэн уопут ылар олус наадалаах уонна туһалаах эбит.
– Дьэ, Диана, эн “ТНТ” ханаалыгар “Танцы” биэриигэ ситиһиилээхтик кыттыбыккын бары өйдүүбүт...
– Аныгы үйэ тэтимэ сайдан, билигин үгүс киһи Интэриниэккэ хараҕа хатанар буолла. Хамсанан-имсэнэн таһаарар тэттик видеоларбар дьон, “Танцы” биэриигэ тиийэн кыттыҥ” диэн үгүстүк суруйар буолбуттара. Онтон кынаттанан, салайааччым Ньургуйаана Николаевна видеоларбын биэрии тэрийээччилэригэр ыыппыт этэ. “Танцы” ааптардара миигин “сааһа кырата бэрт” диэн, өр кэмҥэ толкуйдаабыттара. Кэлин тиһэҕэр ыҥырбыттара. Тугу этиэхпиний? Арассыыйа таһымнаах шоу-бырагыраамаҕа кыттан, бэйэбэр эрэлим өссө улаатта, сайынным. Улахан дьонтон туох да итэҕэһэ суох бэйэбин көрдөрөн, үчүгэйдик кыттан кэлбитим. Бу биэрии шоу буолан, хас хамсаныыгын, туттуугун-хаптыыгын барытын хаамыраҕа уста сылдьаллар этэ. Ол наһаа сылаалаах буолар эбит. Аны туран, төрөппүттэрбин, дьоммун-сэргэбин олус ахтыбытым. Ол иһин салайааччыларбын кытары сөбүлэһэн баран, бэйэм баҕабынан, бырайыактан тахсарга санаммытым. “Танцы” кэнниттэн миигин элбэх киһи билэр буолбута. “Инстаграм” ситимигэр ааҕааччыларым тута элбээн барбыттара. Билигин Арассыыйа куораттарыттан, өрөспүүбүлүкэ араас муннугуттан элбэх киһи суруйар буолла.
– Онтон аны бастакы ханаалга “Лучше всех” Арассыыйа саамай талааннаах оҕолорун сырдатар биэриигэ Максим Галкиҥҥа ыалдьыттаабытыҥ...
– Бу эмиэ эмискэ баҕайы этэ. Дьиҥэр, Вероника диэн кыра кыыһы “Лучше всех” биэриигэ бэлэмнии сылдьыбыппыт. Кини барыахтаах этэ. Онуоха тэрийээччилэр биир үтүө күн миигин ыҥыран “ууга-уокка” түһэрбитттэрэ. Ньургуйаана Николаевналыын биир түүн устата таҥас-сап бэлэмнээн, бүрүчүөскэ оҥостон, Андрей Егоровичтыын үҥкүү үөрэтэн, Москубаҕа көппүппүт. Онно тиийбиппитигэр миигин элбэх киһи билэр этэ. Кыттааччылар бары биир хоско таҥнар буоллахтарына, миэхэ туспа хос кытары биэрбиттэрэ. Түргэн үлүгэрдик, туох да улахан бэлэмнэниитэ суох тахсан, бэйэбин көрдөрбүтүм, Максим Галкинныын алтыспытым. Биэрии кэнниттэн сарсыҥҥы күнүгэр Дьокуускайга айаннаабыппыт.
– Ити бэйэҥ этэн аастыҥ дии... Миигин киһи бөҕөтө билэр буолла диэн. Бэйэҕин “сулус” курдук сананаҕын дуо?
– Суох. Миигин төрөппүттэрим сиэрдээх уонна дьоҥҥо-сэргэҕэ убаастабыллаах сыһыаннаах буоларга ииппиттэрэ. Ол иһин саастыылаахтарбыттан бэйэбин уһулуччу курдук санаммаппын. Майгыбынан сытыы-хотуу киһибин. Кэпсэтинньэҥмин. Боростуой дьиэ кэргэҥҥэ улааппыт буоламмын, боростуой киһибин. Онон түргэнник уопсай тыл булан, кэпсэтэрбин-ипсэтэрбин сөбүлүүбүн.
– Биллэн турар, биллиилээх буолар икки өрүттээх. Дьон-сэргэ болҕомтотугар сылдьар киһи араас саҥаны-иҥэни тулуйуохтаах дииллэр. Эн сурахха-садьыкка хайдах сыһыаннааххын?
– “Диана төрөппүттэрэ баай, ол иһин харчылаах” эҥин диэн суруйалларыттан, саҥаралларыттан хайдах эрэ хомойо саныыбын. Бу олоххо барытын харчы эрэ быһаарбат. Боростуой, ыраах Саха сириттэн сылдьар оҕолор бэйэлэрин аан дойду таһымыгар көрдөрүөхтэрин сөп эбит. Онно баҕа уонна талаан наада. Атына барыта көстөн, табыллан иһир эбит. Улаатан истэҕим аайы күүстээх санаалаах буолан иһэбин. Мин туспунан куһаҕаннык саҥардахтарына, була сатаан иҥиннэхтэринэ наадыйбат буола сатыыбын. Өссө бэрт буола сатаан, доҕордоһо сатыыр биир саастыылаахтарбын өйдөөбөппүн. Аһаҕас, туох да кэтэх санаата суох, ыраас сыһыаннаах дьону кытта алтыһарбын сөбүлүүбүн.
– Төһө элбэх доҕордооххунуй?
– Кылааспыттан түөрт кыыһы кытары үчүгэйдик алтыһабын. Эмиэ Диана диэн ааттаах дьүөгэлээхпин. Доҕоттор бааллар. Элбэхтэр.
– Оскуолаҕа үөрэнэргин төһө сөбүлүүгүнүй, ордук ханнык уруогу чорботуоҥ этэй?
– Сөбүлүүбүн. Тоҕо эрэ алгебра уруогун ордук сэргиибин.
– Кэнэҕэс ханнык идэни баһылыыр былааннааххыный?
– Үҥкүүһүт буолабын. Оскуоланы бүтэрдэхпинэ, тас дойдуга үөрэнэ барар баҕалаахпын. Ол эрээри төрөөбүт дойдубун олус таптыыбын. Тапталлаах Дьокуускайбын кытары ситиммин хаһан да сүтэриэм суоҕа дии саныыбын.
– Диана, төһө сайдыылааххыный? Омук тылын билэҕин дуо?
– Ньиэмэс уонна аангылыйа тылларын үөрэтэбин. Оннук айылаах үчүгэйдик билэбин диэбэппин. Ол эрэн дьулуһан туран үөрэтэбин. Күннээҕи олохпор төрөөбүт тылбынан ордук саҥарабын.
– Интэриниэт ситимигэр төһө олороҕунуй?
– Төлөпүөнүм куруук аттыбар баар. Аныгы олох сиэринэн, биир саастыылаахтарбын, доҕотторбун кытары алтыһарбын, хаартыскаҕа түһэрбин сөбүлүүбүн. Арай үҥкүүлүү, дьарыктана кэллэхпинэ, барытын умнан кэбиһэбин.
– Билигин эн номнуо 8-с кылаас үөрэнээччитэҕин. Мантан антах үөрэх бырагыраамата ыараан иһиэҕэ, түбүктээх эксээмэннэри туттарыы саҕаланыаҕа. Үҥкүүҥ, барыы-кэлии үөрэхххэ мэһэйдиэ суоҕа дуо?
– Үҥкүү диэн – олоҕум аргыһа, тыынар-салгыным, сөбүлүүр дьарыгым. Элбэх киһи интэриэһиргээн ыйытааччы, барытыгар хайдах тиийинэн сылдьаҕыный диэн. Хаһан эрэ сиспин өлөрөн, өр кэмҥэ дьарыктаммакка сылдьыбытым. Онно отой истириэскэ киирэ сыспытым. Хата, үөрэхпэр мөлтөөбүтүм. Билигин бириэмэбин сөпкө аттарар буоламмын, барытыгар тиийинэн үөрэнэ, дьарыктана сылдьабын. “Zavod” үҥкүү бөлөҕүн салайааччылара мин иккис төрөппүттэрим, иитиллээччилэрэ мин убайдарым, эдьийдэрим, балтыларым, бырааттарым... Бары иллээх биир дьиэ кэргэн курдук сыһыаннаахпыт. Онон үҥкүүтэ суох сатаммаппын.
– Диана, кэпсэтиибит былаһын тухары күн күбэй ийэҥ туһунан элбэхтик этэн аастыҥ. Кинини кытары олус чугас сыһыаннааххын дуо?
– Мин ийэм – саамай чугас үтүө доҕорум. Кини миэхэ үҥкүү эйгэтин бэлэхтээбитигэр махталлаахпын. Уопсайынан, төрөппүттэрим хаһан да барарбын-кэлэрбин утарбаттар, хааччахтаабаттар. Хата, сылаас сыһыаннарынан күүс-көмө, өйөбүл буолаллар. Туох баар толкуйбун, санаабын чугас дьонум билэ-көрө сылдьаллар. Манна эбэн эттэххэ, иккис тапталлаах төрөппүттэрим Ньургуйаана Николаевна уонна Андрей Егорович буолаллар. Мин үҥкүүһүт буолан сайдарбар элбэх сыраларын уура сылдьалларын олус сыаналыыбын.
– Диана, кэпсэтиигэ кэлиэм иннинэ эйигин кыра оҕо курдук саныыр этим. Онтум баара, туспа сыаллаах-соруктаах, тус санаалаах, боччумнаах улахан киһи эбиккин...
– Киһи быһыытынан көрсүө майгылаах, кэпсэтинньэҥ, ыраас дууһалаах киһи буола улаатыахпын баҕарабын. Биир саастыылаахтарбар этиэм этэ: хаһан да баҕа санааҕытыттан аккаастанымаҥ, сыаллаах-соруктаах буола улаатыҥ!
– Сэргэх кэпсээниҥ иһин махтал! Ситиһиилээх, кыайыы-хотуу үктэллээх киһи буоларгар баҕарабын!
Кэпсэттэ
Екатерина АФАНАСЬЕВА.
