Муус устар 24 күнүгэр «Чаҕылхайдык үҥкүүлээ! Тэтими тут!» («Танцуй Ярко! Лови Ритм!») диэн ыҥырыы этиилээх «ТЭТИМ – аан дойду норуоттарын үҥкүүлэрэ» («РИТМ – танцы народов мира») үҥкүү шоута буолан ааста. Бу бырайыакка Дьокуускайтан уонна Хатастан бастыҥ үҥкүү кэллэктииптэрэ кыттыыны ыллылар.
Бырааһынньык буола турар үөрүүтэ маҥнайгы мүнүүтэлэртэн биллэн барбыта. Ол курдук, Icenjack диджей күүстээх эниэргийэлээх толоруутугар «Фортуна» үҥкүү устуудьуйата чаҕылхай үҥкүүнү көрдөрөн, тэрээһини саҕалаата.
Шоу бириэмэтигэр имигэс туттунуулаах, артыыс талааннаах, ураты харизмалаах үҥкүүһүттэр көрөөччүлэри сэргэхситтилэр. Ол курдук, кэллэктииптэр саха, нуучча, уйгуур, татаар, узбек, бухар уонна хотугу аҕыйах ахсааннаах омуктар төрүт тэтимнээх хамсаныыларын, маны таһынан, тарантелла, шотландскай уонна аныгы үҥкүүлэри көрдөрдүлэр.
Кыттааччылар: «Фортуна» үҥкүү устуудьуйата, «Версия», «Мозаика», «Калейдоскоп», «Леди плюс», «Аяврина», «Гиркилэн», «Айулна», «Махтал», «Ярилов день», «Ситимчээн», «Галатея», «Тэтим», «Бриллианты Якутии», «Сюрприз», «Алгыстаах доҕордоһуу», «Имэҥ», «Тетрис» ансаамбыллар, Хатастааҕы оҕо ускуустубатын оскуолата, Encanto устуудьуйа.
Өксөкүлээх Өлөксөй аатынан норуоттар доҕордоһууларын дьиэтин кэллэктииптэрэ саҥа үҥкүүлэри көрдөрдүлэр. Ол курдук, «Тетрис» аныгы үҥкүү ансаамбыла «Байкал сибэккитэ» диэн, «Сюрприз» Арассыыйа образцовай кэллэктиибэ, эстрада үҥкүүтүн норуодунай ансаамбыла «Ярилов день» нуучча үҥкүүтүн ансаамбылын кытта «Доҕордоһуу венога» диэн олус бэртээхэй, дьоһун уонна олус чаҕылхай үҥкүү толорууларын көрдөрдүлэр.
Дьоһун үҥкүү киэһэтин бэлэхтээбит толорооччуларга уонна кэллэктииптэр салайааччыларыгар эҕэрдэ буолуохтун!
Өксөкүлээх Өлөксөй аатынан норуоттар доҕордоһууларын дьиэтин пресс-сулууспатын матырыйаалыттан
