Амма улууһугар булка сылдьалларын сөбүлүүр дьахталлар аҕыйаҕа суохтар. Мин бүгүн ыал ийэлэрин, эбэлэрин Валентина Алексееваны уонна Галина Кутукованы билиһиннэрэбин.
Валентина аҕата Иннокентий Григорьевич Валяны үс кыыстан кыралара буолан уол курдук ииппитэ. Балыктыырыгар, бултуу барарыгар илдьэ сылдьара. Дурдаҕа хоноллоругар кустары ытаар диэн баран саатын туттарара, бэйэтэ утуйан хаалара, оттон кыыс түүнү быһа олорон куһу маныыра. Устунан сөбүлээн барбыта, куруутун аҕатын батыһар буолбута. Аҕата кэлин саатын эрэммитэ. Дьүөгэлэрэ ол кэмҥэ скакалкалыы сырыттахтарына кини бултуу барара. Өссө матасыыкыл, массыына ыытар буолбута. Сотору аҕата мопед ылан биэрбитэ. Ити курдук булчут сатабылларын барытын баһылаабыта. Күөгүнэн, илиминэн эмиэ балыктыыр. Аҕата бу сылдьан мэлдьи булт үгэстэригэр эмиэ үөрэтэр буолара. Урут Нуотаранан, Милинэн сылдьара, эһэттэн, бөрөттөн уратыны барытын бултаабыта. Устунан сыал ытыыга кыттар буолбута. Саамай улахан ситиһиитинэн Сунтаарга ыытыллыбыт Манчаары оонньууларыгар бастакы миэстэни ылбыта буолар.
Галина Кутукованы кустуурга уруута Николай Софронов үөрэппитэ. Аҕата Иннокентий Иннокентьевич аар тайҕа аатырбыт булчута, дьонтон туспа өйдөөх – санаалаах, ураты көрүүлээх, олус муударай, мындыр, бөлүһүөк киһи этэ. Инникини өтө көрөр дьоҕурдааҕа, эрдэттэн барытын эндэппэккэ билэр айылҕалааҕа. Элбэх киһини булка уһуйбута, мындыр сүбэлэрин биэрэрэ. Кусчут Галина аныгы дьон сиэринэн массыыналаах, оҥочолоох, автомат саалаах буолан соҕотоҕун сылдьан кустуур. Айылҕа уһуктар, көтөр-сүүрэр кэлэр, чыычааах ыллыыр, айылҕа сыта-сымара тупсар кэмигэр күннээҕи түбүктэн сынньанар, күүһү -уоҕу ылар. Сааскы кэм хайа баҕарар булчукка, ордук дьахтар киһиэхэ саамай кэрэ кэм буолар. Буулдьанан ытыыга улууска, өрөспүүбүлүкэҕэ кэккэ ситиһиилэрдээх.
Алтана Артемьева, ulusmedia
