Горнай улууһун Маҕарас нэһилиэгиттэн төрүттээх, 31 саастаах Сергей Безносов, оҕо сылдьан Саҥа дьыл бырааһынньыгын кэмигэр эстэр тэрилгэ хараҕын сиэтэн, күн сырдыгын көрбөт буолбута сүүрбэччэ сыл буолбут.
Эдэр киһи санаатын түһэрбэккэ Москубаҕа, Алтайга көмпүүтэр куурустарыгар үөрэммит. Онон доруобай дьонтон итэҕэһэ суох көмпүүтэринэн туһанар, бэчээттиир, наадатын быһаарсар эбит. Ол сатабылыгар көрбөт дьону үөрэтэр. Оттон суотабай төлөпүөнүнэн хайдах туһанаҕын диэн ыйытыкка маннык хоруйдуур: “Сенсорнай төлөпүөнүнэн туһаммытым уонча сыл буолла. Көрбөт дьоҥҥо аналлаах саҥарар бырагыраамма баар. Ону ылан өр да өр үөрэтэн, бассаабынан, Инстаграмынан холкутук туһанабын. Кэлин көрбөт дьоҥҥо бу бырагыраамма туһунан кэпсиир, тарҕатар буолбутум”.
Сергей 2016-19 сылларга Мииринэй куоракка массаас оҥорорго үөрэммит. Ааспыт сыл атырдьах ыйыттан “Аврора” килииньикэҕэ баар "Утум" уһун үйэлэнии киинигэр үлэлиир.
“Бастаан бэйэм-бэйэбэр ыҥырыыга сылдьан массаастыыр этим. Ордук чааһынай тэрилтэлэргэ үлэлээбитим. Дьонум олохтоох үлэлээх буолуохтааххын диэннэр, биир үтүө күн “Аврора” килииньикэҕэ резюмебын ыыппытым. Сарсыныгар ыҥырбыттара. Оннук үлэҕэ киирбитим. Үлэбин олус сөбүлүүбүн. Саастаах дьоҥҥо ордук эмтээх классическай массааһы оҥоробун. Сааһырбыт дьон ордук хондуруостара, сүһүөхтэрэ ыалдьарын кэпсииллэр.Ким туга ыалдьарынан массаастыыбын”.
