Арҕааҥҥы дойдуларга, чуолаан АХШ-ка, оҕо аатын иҥэрэр идэлээх дьон баар буолан эрэллэр, дьон кинилэр өҥөлөрүнэн хамаҕатык туһанар, ити барыта үчүгэй биисинэс буолла диэн суруйаллар.
“Оннук идэлээх дьон, анал консультаннар эбэтэр эспиэрдэр, саҥа төрөөбүт оҕоҕо араспаанньатыгар барсар, дьүөрэлии иһиллэр ааты талан иҥэрэллэр. Оннук талан биэрбит ааттара киһи оҕо да, эдэр да, кырдьар да сааһыгар тиийдэҕинэ кыраһыабайдык иһиллэр буолуохтаах. Ону таһынан, төрөппүттэр оҕо улаатарын саҕана кини үөлээннээхтэрэ оҕону аатыттан сылтаан ыыстаабаттарын, дьээбэ-хообо оҥостубаттарын эмиэ учуоттуохтаахтар. Оҕо аата кини бигэ тирэҕэ, майгытын-сигилитин толору арыйар буолуохтаах уонна кинини кытта тэҥҥэ кырдьыахтаах”, – диэн арҕааҥҥы дойду исписэлиистэрэ сүбэлиир буолбуттар.
"Нью-Йорк пост" хаһыакка ааты иҥэрэр эспиэрдэр тустарынанОннук “эспиэрдэр” уонна “исписэлиистэр” сыаналара кырата суох, ботуччу буолар эбит. Холобур, 1,5 – 5 тыһыынча дуоллар. Ол аата биһиги харчыбытыгар таһаардахха, 135 – 460 тыһыынча солкуобай.
Дьиҥэр, оҕону төрөппүт буолбакка, туора киһи ааттыыр үгэһэ элбэх омукка баар. Ол туһунан саха аатын-суолун (ономастика) анаан чинчийбит учуонай Егор Николаевтан сурастыбыт:
– Оҕону төрөппүт буолбакка, туора киһи ааттыыр көстүүтэ элбэх омукка баар буолар. Холобур, саҥа төрөөбүт оҕону дьиэҕэ бастаан киирбит киһи, ыалдьыт-хоноһо эбэтэр аҕа ууһун ытык дьоно ааттыахтарын сөп. Биллэн турар, оннук дьон ааттаабатаҕына, төрөппүттэр, дьиэлээхтэр бэйэлэрэ сүрэхтииллэр буоллаҕа. Сахаҕа итинник көстүү эмиэ былыргыттан баар. Ол туһунан өссө сахалары биир бастакынан чинчийбит Я.Линденау үлэлэригэр ахтыллан ааһар.
“Саҥа барыта – үчүгэйдик умнуллубут былыргы” диэн нуучча өһүн хоһооно баар. Оҕону ааттыыр умнуллубут үгэс баарын сөргүтэн, ону аныгы кэмҥэ дьүөрэлээн, кимнээх эрэ үчүгэй биисинэс оҥостон “үлэлии-хамсыы” сылдьаллар, онон айахтарын ииттэллэр. Муода түргэнник тарҕанар дииллэр. Ити үгэс өссө киэҥник тарҕанан бардаҕына, биһиэхэ да өтөр тиийэн кэлиэҕэ. Онон ити кимнээххэ эрэ үчүгэй идиэйэ буолуон сөп. Тоҕо кыаллыа суоҕай? Кимнээх эрэ оҕолорун үчүгэй баҕайытык сахалыы аттаан баран: “Бу аат ис хоһооно маннык. Киниэхэ бу аат ордук барсар. Эдэригэр да, кырыйдаҕана да дьүөрэлии иһиллэр буолуоҕа, ситиһиигэ сирдиэҕэ”, – диэн арыый уус тыллаах киһи тааҕы-таах кэпсиэн сөп.
Бэй.кэр.
