Саха сирин үрдүк мэҥэ халлааныгар бастакы дьарапалаан хаһан көппүтэй? Өлүөнэ эбэ долгуннарыгар уйдаран, бастакы борохуот аал хаһан устан кэлбитэй? Саха ыала тэлэбиисэр күөх экранын хаһан сөҕө-махтайа аан бастаан көрбүтэй? Бу уонна да атын дириҥ суолталаах боппуруостарга хоруйу барытын бу дьэрэкээн оҕо каартатыттан билиэххэ сөп.
Хайа төрөппүт аныгы сайдыылаах үйэҕэ оҕото дойдутугар бэриниилээх патриот буола үүнүөн баҕарбат буолуой?
Оҕо билиитин хаҥатарыгар төрөөбүт өрөспүүбүлүкэбит туһунан дьэрэкээн ойуулардаах “Моя Якутия. События и достопримечательности” диэн каарта көмөлөһөрө, салгыы дириҥник иҥэн-тоҥон үөрэтэргэ интэриэһи саҕара эрэбил.
Манна тапталлаах Сахабыт сирин хас биирдии улууһа туох уратылааҕа бэлиэтэммит. Холобур, Амма диэтэхтэринэ, харахпытыгар тута дьэдьэн көстө түһэр. Чымаан тымныытынан сураҕырар Өймөкөөнү эттэхтэринэ – Чысхаан. Улуустарынан устуоруйаҕа киирбит сабыытыйалар, чахчылар киирбиттэр. Холобур, Аҕа дойдуну көмүскүүр Улуу сэрии сылларыгар “Аляска – Сибиир” авиатрасса сөмөлүөттэрэ чопчу ханнык оройуоннарынан көппүттэрин эмиэ билиэххит. Маннык чахчылары таһынан, саха киэн туттар дьоно киирбиттэр. Холобур, өрөспүүбүлүкэни тэрийсибит чулуу дьоммут Б. Ойуунускай, М. Аммосов, И. Барахов, С. Аржаков, С. Васильев, бастакы бэрэсидьиэммит М. Николаев, Сэбиэскэй Сойуус Дьоруойдара, бастакы олимпийскай чөмпүйүөммүт Т.Пинегин уо.д.а.
Билэрбит курдук, киһи аймах устуоруйата диэн улахан кыайыы-хотуу, сайдыы эрэ буолбатах; бу күлүк өттө: хаан тохтуулаах кыргыһыылар, репрессия, хоту көһөрүү уо.д.а. Холобур, пионердар олохторо толук буолбут Саһыл Сыһыы трагедиятын, хомсомуоллар Хохочойго тоһуурга түбэспиттэрин туһунан обургу оҕо истэ-билэ улаатара, кини олох үрүҥүн-харатын, үтүөтүн-мөкүтүн араарыгар олук буолара саарбахтаммат. Алдьархайы аҕалбыт алҕастар аны хаһан да хатыламматтарын курдук...
Муус устар 27 күнүгэр Саха АССР 100 сылын бэлиэтиэхпит. Бу бэлиэ даатанан үүнэр кэнчээри ыччат төрөөбүт өрөспүүбүлүкэтин устуоруйатын туһунан билиитин кэҥэтэригэр, интэриэһи уһугуннарарыгар бу каарта – дьоһуннаах бэлэх.
Ыччаппыт киэн тутуннун Сахатын сирин сорҕото буоларынан – төрүт сиринэн, омугунан, кини ситиһиилэринэн, норуоттан үөскээн-үүнэн тахсыбыт уһулуччулаах айар-тутар, хорсун сүрэхтээх дьонунан. Киэн туттуу иэйиитэ киһи ис кутун бөҕөргөтөр, тирэхтээх, бэйэтигэр эрэллээх, эр санаалаах буоларыгар көмөлөһөр.
Людмила Баишева-Федорова.
