Билигин алын сүһүөх кылаастар үөрэнээччилэрэ бөлөхтөрүнэн арахсан үөрэнэ сылдьаллар. Маныаха, балаҕан ыйын 21 күнүттэн холбоон үөрэтэр буолуохтара.
Мониторинг уонна үөрэх хаачыстыбатын хонтуруоллуур отдел салайааччыта Мирослава Афанасьева этэринэн, 2020-2021 с. үөрэх дьылыгар куоракка уопсайа 52 муниципальнай тэрилтэ үлэтин саҕалаабыт.
“Быйыл барыта 1685 кылаас кэмпилиэгэ тэриллибит, 49 982 үөрэнээччи. Ааспыт сылга тэҥнээтэххэ, 2911 оҕонон элбэх” диэн салайааччы быһааран этэр.
Бүгүҥҥү күҥҥэ куорат 10 оскуолата бүүс-бүтүннүү күнүскү эрэсиимҥэ көһөн үлэлииллэр. Оттон 39 оскуола икки форматынан уларыта сылдьан үөрэҕи ыыталлар. Дьиэттэн олоруу формакка үс оскуола киирэн үлэлиир. Икки оскуолаҕа биирдии кылаас ОРВИ ыарыы күүскэ бэлиэтэнэн, харантыыҥҥа хапсан сабыллыбыттар.
Санатан эттэххэ, балаҕан ыйын 21 күнүттэн 5-с, 9-с, 10-с, 11-с кылаас үөрэнээччилэрэ күнүскү эрэсиимҥэ көһөн үөрэнэр буолуохтара. Бу туһунан Дьокуускай куорат үөрэхтээһиҥҥэ салалтатын начаалынньыга Алексей Семенов иһитиннэрэр.
