“Арҕаалар сол да Арассыыйа экэниэмикэтин сатаан хам баттаабатылар.
Дойду үпкэ тиһигэ үлэлээбитин курдук үлэлии турар, оттон солкуобай кууруһа евроҕа сыһыаннаан, кэнники сэттэ сылга олох да муҥутуурдук үрдээтэ”, – диэн Германия Deutsche Wirtschafts Nachrichten таһаарыыта суруйбут. Салгыы: “Арҕаа дойдулар үгүс ырытааччылара Украинаҕа Арассыыйа анал эпэрээссийэни биллэрбитигэр солкуобай суолтата тута түһүө диэн сабаҕалаабыттара, онтулара сыыһа буолла”, – диэн, тоһоҕолоон биэрбит. “G7 дойдуларыттан атына, Евросойуус дойдулара Арассыыйа “хара көмүһүттэн” аккаастанар кыахтара суох. Ону таһынан Арассыыйа атыыга сүтүгүн Индияҕа, Кытайга атыылаан киллэринэр”, – диэбит.
Эрдэ Кытай Global Times диэн таһаарыыта Азия, Соҕуруу Эмиэрикэ, Африка үгүс дойдулара Арассыыйаны утары сааҥсыйаны өйүүртэн аккаастаммыттарын, ону сэргэ Чугастааҕы Илин үгүс өттө да сааҥсыйаттан туттунарын санаппыт. Арҕаа дойдулар Арассыыйаны утары, сүрүннээн, баан уонна үрдүк технология эйгэлэригэр сааҥсыйа биллэрбиттэрэ. Ону таһынан Арассыыйа ньиэбиттэн-гааһыттан букатын аккаастанарга ыҥыраллар. Ол гынан баран олохсуйбут технологическай тиһиккэ итинник орооһуу Европаҕа уонна АХШка бэйэлэригэр кыһалҕаны үөскэттэ. Туох-ханнык иннинэ ас-таҥас уонна уматык сыаната үрдээтэ. Ол уопсай сыана үрдүүрүгэр тиэрдэр.
Манна сыһыаран эттэххэ, Москуба биржатыгар ыам ыйын 25 күнүгэр евро кууруһа түһэн, 58,87 солк. тэҥнэспитэ.
