Алтынньы 11-14 күнүгэр VII «Үрүҥ хаар алгыһа» (Благодать большого снега) норуоттар икки ардыларынааҕы поэзия бэстибээлэ буолуоҕа. Манна Москуба, Махачкала, Архангельскай, Уфа, Казань, Казахстан, Кыргыстан айар талааннаахтара кыттыахтара.
«Үрүҥ хаар алгыһа» поэзия бэстибээлэ 2012 сылтан икки сылга биирдэ ыытыллар. Сүрүн тэрийээччи СӨ Култуура уонна духуобунай сайдыы министиэристибэтэ, М.К. Аммосов аатынан ХИФУ уонна Саха сирин суруйааччыларын сойууһа буолаллар.
Бэстибээл аата Саха сирин норуодунай бэйиэтэ Семен Данилов хоһоонуттан үөскээбит. Ол да иһин маҥнайгы хаар түһэр кэмигэр – алтынньы ортотугар ыытыллар. Тэрээһин, аата да этэрин курдук, Саха сирин имиджин үрдэтиигэ улахан суолталаах. Манна Саха сирин норуоттарын литэрэтиирэтин сэҥээрэр суруйааччылар уонна бэйиэттэр, Саха сирин туһунан суруйбут уонна суруйар баҕалаах ааптардар, тылбаасчыттар кытталлар. Сүрүн соруга – омуктар доҕордоһууларын күүһүрдүү, литэрэтиирэҕэ уонна ааҕыыга нэһилиэнньэ интэриэһин көҕүтүү.
Тэрээһин кэмигэр суруйааччылар устудьуоннары кытта көрсүһүөхтэрэ, улуустарга сылдьыахтара, араадьыйа уонна тэлэбиидэнньэ биэриилэригэр кыттыахтара, аныгы поэзия уонна тылбаас кыһалҕатын тула төгүрүк остуоллары ыытыахтара. Ааспыт бэстибээллэргэ Польша, Болгария, Вьетнам, Монголия, Казахстан, Киргизия, Сербия, Бурятия, Алтай, Азербайджан, Тыва, Татарстан, Москуба к. бэйиэттэрэ кыттыбыттара.
Бэстибээл ыытыллыаҕыттан поляк тылынан «Саха аныгы поэзиятын антологията», П.А. Ойуунускай азербайджан тылынан тылбаас кинигэтэ, Наталья Харлампьева уонна Евдокия Аксенова-Огдо англия тылынан кинигэлэрэ тахсыбыттара. Маны сэргэ саха поэзиятын турок, болгар, монгол, казах уонна кыргыс тылынан хомуурунньуктара тахсыбыттара. Бөдөҥ кинигэ таһаарааччылары, литэрэтиирэ бэстибээллэрин уонна күрэстэрин тэрийээччилэри – Александр Навроцкайы (Польша), Марат Ахмеджановы (Великобритания), бэйиэт Экбер Гошалы уонна да атыттары кытта ситим олохтоммута.
Сонун төрдө: СӨ Култуура уонна духуобунай сайдыы министиэристибэтин пресс-сулууспата
