Ытыктабыллаах Галина Никитична, эйигин «Ситим» медиа-бөлөх уонна «Кыым» хаһыат аатыттан ис сүрэхпититтэн үөрэ, долгуйа үбүлүөйдээх күнүнэн истиҥник эҕэрдэлиибит!
Эн ырыа алыптаах эйгэтигэр анаабыт айар үлэҥ, кэрэ куолаһыҥ, ураты толорууҥ саха дьонун өйүгэр, сүрэҕэр хаһан да умнуллубаттык иҥпиттэрэ. Ама ким умнуой «Балыктаах киэһэтэ», «Умнуллубат вальс», «Дьүөгэлэриэм, кыргыттарыам», «Ахтылҕан», «Ньургуһунна бэлэхтээ» уонна да атын бииртэн биир үчүгэй ырыалары киэҥ эйгэҕэ хайдах көтүппүккүн, бар дьонуҥ сүрэҕин ыраас иэйиинэн толорбуккуҥ! Ол да иһин Сойуус үрдүнэн биллэҥҥин, Сахаҥ сирин элбэхтик ааттаппытыҥ, бар дьон тапталын, билиниитин ылбытыҥ.
Хас эмэ уонунан сыллары быһа тапталлаах дойдуҥ куйаас сайыныттан, тыйыс кыһыныттан тутуллубакка, суола-ииһэ куһаҕаныттан иҥнибэккэ, улуустары барыларын кэриэтэ кэрийэн, тыа дьонугар элбэх үөрүүнү бэлэхтээбитиҥ.
Култуура сайдыытыгар ырыаһыт эрэ быһыытынан буолбакка, учуутал быһыытынан эмиэ үгүс үтүөлээххин. Элбэх ыччаты ырыаҕа уһуйбутуҥ, дьиҥ култуура үлэһитэ буоларга бэлэмнээбитиҥ.
Күндү Галина Никитична, эйиэхэ туйгун туругу, уйгулаах олоҕу, толору дьолу баҕарабыт. Бар дьонуҥ тапталынан, махталынан угуттанан, үөрүү-көтүү аргыстан, уһун үйэлэн!
Эн куолаһыҥ хатыламмат, эн толорууҥ умнуллубат!
Махталы кытары «Ситим» медиа-бөлөх уонна «Кыым» хаһыат
