Бүгүн, алтынньы 7 күнүгэр, Арассыыйа бэрэсидьиэнэ Владимир Владимирович Путин 70 үбүлүөйдээх сааһын бэлиэтиир. Төрөөбүт күнүгэр дойдубут муҥутуур тойоно Санкт-Петербург куоракка үлэлиэҕэ – онно СНГ дойдуларын салайааччыларын кытта формальнайа суох көрсүһүү буолуоҕа. Бу туһунан дойду баһылыгын пресс-сэкэрэтээрэ Дмитрий Песков суруналыыстарга иһитиннэрэр.
«Бэрэсидьиэн Санкт-Петербурга үлэлиэҕэ. Олус элбэхтэ дойдулар икки ардыларынааҕы төлөпүөнүнэн кэпсэтии буолуоҕа, биһиги бу туһунан сырдатыахпыт. Маны таһынан, күн ортотугар бэрэсидьиэммит СНГ судаарыстыбаларын кытта формальнайа суох көрсүһүүтэ буолуоҕа», - диэн Песков сырдатыытын ТАСС иһитиннэрэр.
Пресс-сэкэрэтээр эппитинэн, көрсүһүү Константиновскай дыбарыаска ааһыаҕа уонна аныгыс нэдиэлэҕэ Астанаҕа буолуохтаах СНГ саммитыгар бэлэмнэниигэ биир сүрүн кэрдиис быһыытынан буолуоҕа.
Суруналыыстар Песковтан көрсүһүү «бырааһынньыктааҕы бэлиэлээх» буолуоҕа дуо уонна тас дойдуттан кэлбит салайааччылар эҕэрдэлэрэ боротокуолунан көрүллүөхтэрэ дуо диэн ыйыппыттар.
«Быраабыла быһыытынан, боротокуол маны хаһан даҕаны көрбөт, биир үксүн бэлэхтэри боротокуол лииньийэтинэн тиэрдээччилэр. Ол эрээри, биллэн турар, бары бэйэ-бэйэлэрин бастакы сылларын буолбакка, уонунан сыл тухары билэллэр, онон, көннөрү буоларын курдук эҕэрдэлэр этиллэллэрэ буолуо», - диэн Песков быһаарбыт.
Маныаха, кини В.В. Путин бырааһынньыгын хайдах бэлиэтээри сылдьарын, бу күн чугас дьонун уонна доҕотторун кытта көрсүһүү олохтуурун-суоҕун туһунан чопчу быһаарбатах. «Оттон дьиэ кэргэн тиэмэтин таарыйар буоллахха – бу туспа боппуруос. Билэргитинэн, биһиги бу туһунан кэпсиирбитин сөбүлээбэппит», - диэн Песков этэр.
