Нам улууһун Хатырык нэһилиэгэр, биллиилээх Сэбиэскэй судаарыстыбаннай, бартыыйынай диэйэтэл Максим Аммосов төрөөбүт-үөскээбит сиригэр, Өрөспүүбүлүкэ искибиэрин арыйыы бэлиэ тэрээһинэ буолан ааста.
Тустаах искибиэр Уһук Илиҥҥэ үлэлиир “1000 тиэргэн” диэн дьон сынньанар, сайдар туоналарын тэрийэргэ туһуламмыт уонна гражданскай көҕүлээһини өйүүр өрөспүүбүлүкэ бырагыраамаларын көмөлөрүнэн олоххо киирдэ.
Искибиэри арыйыы үөрүүлээх тэрээһинигэр Нам улууһун баһылыга Юрий Слепцов, Хатырык нэһилиэгин баһылыга Юрий Дьяконов, СӨ кылаабынай архитектора Ирина Алексеева, тутууну ыыппыт «ГМ-групп» уонна “Лигран” ХЭУо бэдэрээттээх тэрилтэлэр генеральнай дириэктэрдэрэ Михаил Гуляев уонна Григорий Кобяков кытыннылар. Тэрээһиҥҥэ эҕэрдэ тылы кылаабынай архитектор Ирина Алексеева уонна Москубаттан кэлэ сылдьар архитектор Гелена Сергеева эттилэр.
Улуус баһылыга Юрий Слепцов бу ааһан эрэр 2022 сыл улууска Максим Аммосовка анаммытын Өрөспүүбүлүкэ төрүттэниитигэр сүҥкэн кылааттаах Чаҕылхай Максим төрөөбүт, улааппыт сирэ салгыы сайдарын, үүнэрин, ону тэҥэ бу сылга туох үлэ ыытыллыбытын иһитиннэрдэ.
Ол курдук, чулуу биир дойдулаахтара күн сирин көрбүтэ 125 сылыгар сыһыаран, Намтан Хатырыкка тиийэр суолу икки сыл устата аспааллаан, үлэҕэ киллэрдилэр. Аммосов аатынан орто оскуола уонна СӨ Судаарыстыбаннаһын түмэл хапытаалынай өрөмүөннэрэ ыытылынна. 75 кырачаан сылдьарыгар, сайдарыгар сөптөөх дьыссаат дьиэ үлэҕэ киирдэ.
Ону тэҥэ улууска Култуура-успуорт элбэх хайысхалаах киинэ тутулла турарын билэҕит. Бу манна универсальпай саалалаах успуорт комплекса, бибилэтиэкэ, Оҕо ускуустубатын оскуолата уонна 150 миэстэлээх аактабай саалалаах “Сайдам” норуот уус-уран айымньытын дьиэтэ түстэниэхтэрэ. Бу күүтүүлээх Киин тутуута эһиил түмүктэнэн, үлэҕэ киириэхтээх.
Оттон бу аһыллыбыт Өрөспүүбүлүкэ искибиэригэр архитектура араас тутуута, оҕо уонна успуорт былаһааккалара, ону сэргэ өрөспүүбүлүкэ, улуус уонна нэһилиэк историятын кэпсиир истиэндэ баар. Ону таһынан олохтоохтор уонна ыалдьыттар иллэҥ кэмнэрин атааралларыгар аналлаах ураһаны дьэндэппиттэр.
Олохтоохтор бу саҥа искибиэр түстэниитигэр көмөлөөх, кыттыгастаах дьоҥҥо ис сүрэхтэриттэн махтаналлар.
Бу күн өссө Саҥа дьыллааҕы харыйа уота күлүмүрдүү оонньоото.
Сонун төрдө: Нам улууһун пресс-сулууспата
