Бүтүн Арассыыйатааҕы «Арассыыйаҕа сыл бастыҥ учуутала – 2023» күрэс финалы бастакы түһүмэҕэ түмүктэннэ. Сэттэ күн устата финалтистар педагог дьыктаанын суруйдулар, дьүүллүүр сүбэҕэ уруоктарын уонна үөрэх таһынан дьарыктарын көрдөрүлэр. Барыларыттан элбэх баалы ылбыт 15 лауреат ортотугар Бэрдьигэстээх улуустааҕы гимназиятын физикаҕа учуутала Иван Дьяконов баар.
Иван Герасимович - өрөспүүбүлүкэтээҕи "Сыл бастыҥ учуутала - 2022" күрэс муҥутуур кыайыылааҕа. Онно кини А.И.Герцен аатынан Арассыыйатааҕы судаарыстыбаннай педагогическай университет магистратуратыгар босхо үөрэнэр сэртипикээт туппута уонна "Саха сирин эрэлэ" бэлиэнэн наҕараадаламмыта. Бүтүн Арассыыйатааҕы күрэскэ кинини С.Н. Донской-II аатынан Үөрэҕириини сайыннарыы уонна таһымы үрдэтии институтун дириэктэрэ Павлов Ньургун Михайлович бэлэмнээтэ.
Алтынньы 1 күнүгэр күрэс иккис турун тургутуулара саҕаланаллар. Манна кыттааччылар киэҥ састааптаах дьүүллүүр сүбэҕэ маастар кылаас көрдөрүөхтэрэ уонна лиэксийэ ааҕыахтара. Кыайыылаахтары Кириэмил дыбарыаһыгар алтынньы 5 күнүгэр биллэриэхтэрэ.
Билигин РФ Үөрэҕириитин министиэристибэтин аан ситимигэр куоластааһын бара турар. Алтынньы 3 күнүгэр 12:00 (мск) диэри биир дойдулаахпытыгар бу сигэнэн https://vk.com/write-30558759 киирэн куоластыыргытыгар ыҥырабыт.
Сонун төрдө: СӨ Бырабыыталыстыбатын уонна Ил Дарханын пресс-сулууспата
