Ийэ дойдуга ытыктабыл, бэриниилээх буолуу – бу барыта ыччаты патриотическай иитиигэ тирэх буолар. Алтынньы 2 күнүгэр Сунтаардааҕы технологическай колледжка Арассыыйа Геройа Филипп Евсеевтыын устудьуоннар, үлэһиттэр истиҥ көрсүһүүлэрэ буолла. Көрсүһүүгэ Сунтаар нэһилиэгин баһылыга Эдуард Филиппов кыттыыны ылла.
Филипп Евсеев колледжка силиэсэр-суоппар идэтин үөрэнэн бүтэрбитэ. Бу идэ аармыйаҕа сулууспалыырыгар уонна байыаннай анал эппэрээссийэҕэ ытык иэһин толороругар көмө буолбутун бэлиэтээтэ. Филипп Евсеев устудьуоннар боппуруостарыгар хоруйдаата.
Сунтаардааҕы технологическай колледж кэлэктиибэ выпускникпытынан киэн туттабыт. Кини икки эһэлэрин Николай Ващенко, Филипп Евсеев, Аҕа дойду Улуу сэриитин кыттыылаахтарын, туйахтарын хатаран, саха боотурун мындыр өйүн, күүһүн-уоҕун аан дойдуга көрдөрдө, суон сураҕырта.
Сунтаар нэһилиэгин баһылыга Эдуард Филиппов байыаннай анал эппэрээссийэҕэ ытык иэһин толоро сылдьар биир дойдулаахтарбыт Ийэ дойдуга ытык иэстэрин хорсуннук толоро сылдьалларыттан киэн туттарын уонна эдэр ыччат патриотическай өйдөөх-санаалаах буоллаҕына дойдубут инникигэ кэскиллээхтик сайдарын бэлиэтээтэ.
Колледж идэлээх сойууһун бэрэссэдээтэлэ Константин Тотонов үөрэммит коллеһыгар кэлэн, Арассыыйа Геройа Филипп Евсеев ыалдьыттаабытыгар махтанан туран, кэлэктиип аатыттан үрүҥ көмүстэн сахалыы харысхал, сувенир уонна колледж туһунан кинигэни бэлэхтээтэ.
Александра Павлова
