Москубаҕа VIII Бүтүн Арассыыйатааҕы күрэс кыайыылаахтарын наҕараадалыыр үөрүүлээх тэрээһин буолла. Манна дойду бары муннугуттан 80 тахса дьиэ кэргэн кытынна. Ол иһигэр Томпо улууһун Тополинай сэлиэнньэтигэр олорор Стручковтар дьиэ кэргэн баар.
Варвара уонна Дмитрий Стручковтар «Дьиэ кэргэн – төрүт үгэһи харыстааччы» номинацияҕа кыайыылаах буоллулар. Кинилэр түөрт оҕолоохтор. Удьуор табаһыттар төрүт идэлэрин оҕолоругар уонна сиэннэригэр хаалларар баҕа санаалаахтар. Билигин улахан уоллара техникумҥа үөрэнэр, оттон кыра кыыстара тоҕус эрэ ыйдаах.
Үөрүүлээх тэрээһин «Золотое кольцо» норуот муусукатын уонна ырыатын национальнай тыйаатырыгар ыытылынна. Уустуктары көрсүбүт оҕолору өйүүр пуонда бырабылыанньатын бэрэссэдээтэлэ Марина Гордеева тыл этиитигэр күрэс киэҥ географиялааҕын бэлиэтээтэ. Ол курдук, инники күөҥҥэ тахсыбыт 52 кыттааччы тыа сиригэр – бөһүөлэктэргэ, дэриэбинэлэргэ, аулларга, станицаларга, хутордарга олорор эбит.
Быйыл күрэскэ РФ 86 субъегыттан, ол иһигэр Донецкай уонна Луганскай норуодунай өрөспүүбүлүкэлэртэн, 384 дьиэ кэргэн кытынна.
Биир дойдулаахтарбытын үрдүк ситиһиилэринэн эҕэрдэлиибит уонна бары үтүөнү баҕарабыт!
Сонун төрдө: СӨ Үлэ уонна социальнай сайдыы министиэристибэтэ
