MyTona уонна Fntastic бу оонньууну түөрт сылтан ордук кэмҥэ кыттыһан оҥордулар. Былаан быһыытынан, оонньуу 2022 сыл бэс ыйын 22-тигэр, Ыһыах күн, киэҥ эйгэҕэ тахсыахтаах этэ. Ол эрээри кэккэ биричиинэлэринэн кэмигэр кыайан тахсыбытаҕа. Онтон бу соторутааҕыта “ахсынньы 7 күнүттэн атыыга тахсан эрэр” диэн сонуну сэҥээрэ иһиттибит.
Технология күүһэ-кыаҕа сайдан истэҕин аайы, дьиҥ олох икки виртуальнай эйгэ икки кыраныыссалара сайҕанан иһэргэ дылы. Көмпүүтэр оонньуулара олус күүскэ сайыннылар, аҥаардас кэм ирдэбилэ буолбатахтарын дакаастаатылар. Аныгы үйэ индустриятын быһыытынан дьон-сэргэ билиниитин ыллылар, киберспорт уонна креативнай индустрияҕа олоҕурбут аныгы экэниэмикэ үөскүүр аартыктарын астылар. Сотору кэминэн Сахабыт сиригэр үөскээбит MyTona уонна Fntastic тэрилтэлэр көмпүүтэр оонньуутун биллэр-көстөр оҥорон таһаарааччылара буолан, бэйэлэрин кэнниттэн батыһааччылары бу эйгэҕэ сирдиэхтэрэ.
Көмпүүтэр оонньуутун оҥорон таһаарыы аан дойду үрдүнэн биир саамай күүстээх уонна дохуоттаах биисинэс буоларыгар саарбахтааһын суох. Холобур, 2021 с. АЛРОСА хампаанньа 32,4 мөл. караат алмааһы оҥорон таһааран, 4,6 млрд АХШ дуолларын “өлөрбүтэ”.
Аны улахан көмпүүтэр оонньуутун оҥорор тэрилтэлэр дохуоттарын тэҥнээн көрүөҕүҥ. Бу салааны интэриэһиргиир дьон бары билэр Epic Games диэн оҥорон таһаарааччылара 2021 с. 5,1 млрд дуоллары оҥорбут. Electronic Arts – 5,6, Activision Blizzard – 8,8, Nintendo – 15,3, Sony Interactive Entertainment – 24,9 млрд дуоллары киллэрбиттэр.
Фанаттар үс сыл долгуйа күүттүлэр
The Day Before 2021 с. саҥатыгар күүскэ тарҕаммыта, онно оонньууттан биэс мүнүүтэлээх видеоҕа зомби-апокалипсиһы кытта хамаанданан киирсиилэри көрдөрүү улахан оруолу оонньообута. Инньэ гынан Steam 200 тыһ.-ттан ордук сурутааччыламмыта.
Оонньуу тизер-трейлеригэр Lamborghini курдук массыына куорат устун айанныыра көстөр. Ааптардар 2006 с. Уилл Смит “Я – Легенда” киинэтиттэн санаалара кынаттаммыта тута харахха быраҕыллар, киинэ саҕаланыытыгар сүрүн дьоруой кыһыл Ford Mustang массыынанан иччитэхсийбит Нью-Йорк устун айанныы сылдьара көстөрө. Оҥорон таһаарааччылар, бэл, Смит киинэҕэ бултаабыт табатын оонньууга киллэрбиттэр.
The Day Before – Аан дойдутааҕы пандемия кэннинээҕи кэмҥэ буола турар шутер оонньуу (о.э. ытыалаһыылаах оонньуу). ММО жанрдаах оонньууга апокалипсис кэнниттэн тыыннаах хаалар туһугар араас быһыыттан-майгыттан ,быыһанан тахсыахтааххын.
Ааптардар сүрүн болҕомтону оонньооччу араас көрүҥ зомбилары кытта киирсиитигэр уураллар. “Оонньууга New Fortune City диэн халлааҥҥа харбаспыт элбэх этээстээх дьиэлэрдээх куораты чинчийиэххэ, онно дьиэ атыылаһыахха, массыынанан хатааһылыахха, тус устуоруйаны оҥостуохха сөп”, – дииллэр оҥорон таһаарааччылар. Бэлиэтээн эттэххэ, оонньууга баар дьиэҕэр доҕотторгун ыҥырыаххын, бэйэҥ баҕанынан миэбэли уларытыаххын сөп. Ону тэҥэ, дьиҥ олоххо курдук, көмпүүтэр оонньуутун дьиэтигэр атын дьонтон, зомбилартан саһыаххын сөп. Маннык чуумпу, куттала суох сирдэргэ таһаҕасчытынан, мусукаанынан үлэҕэ киириэххэ, билсиэххэ, кэпсэтиэххэ сөп. Өссө хас да киһи түмсэн араас квестэри ааһыахтарын, урусхалламмыт уопсастыбаны сөргүтүөхтэрин син. Оонньууга оннооҕор саунаҕа, барга сынньалаҥ баар.
Олох саҥа оонньууну оҥорон таһаарыы
Быһа түһэн эттэххэ, оҥорон таһаарааччылар көмпүүтэр оонньуутун саҥа таһымҥа таһаарарга санаммыттар – хас да жанры холбуу туппуттар. Манна ытыалаһыылаах шутер, тыыннаах хаалар иһин киирсии, массыынанан сырсыы уонна GTA курдук массыына күрэтиилээх, SIMS курдук дьиҥнээх олоххо майгыннаах барыта баар. Оҥорон таһаарааччылар үгүс “нативнай” (о.э. естественнэй) эрэкэлээмэни киллэрбиттэрин киһи бэлиэтии көрөр. Ол курдук массыыналар, таҥас-сап, кафе, ас-үөл, утахтар, эрэкэлээмэ баннердара харахха быраҕыллаллар. Оонньуу биир уратыта – атыылыыр уонна атыылаһар кыах бэриллэрэ. Манан сабаҕалаатахха, Web 3.0 технология өтөн киирэрэ чугаһаабыкка дылы.
Бүгүҥҥү күҥҥэ Fntastic бырайыага Steam саамай күүтүүлээх оонньууларын ахсааныгар иккис миэстэҕэ сылдьар. Бастакыга – Battlefiel оҥорбут The Finals шутера, үһүскэ – Hades 2. Онон саха оҥорон таһаарааччылара айбыт-туппут оонньуулара индустрия үрдүкү чыпчаалыгар тиийэри ситистэ, салгыы туох-хайдах буоларын бириэмэ көрдөрөн иһиэҕэ.
Оонньуу, бастатан туран, персональнай көмпүүтэрдэргэ тахсыаҕа, онтон – PS5, X уонна S Xbox Series эмиэ баар буолуо.
Андрей ШИЛОВ.
kyym.ru
Сэҥээриилэр