Билигин сөмөлүөккэ бииргэ көтөр дьону “куттал суох буолуутун мэктиэтэ” диэн матыыптаан, тус-туспа олордоллоро баар суол. Ханна эрэ бииргэ айаннаан иһэр кэллиэгэлэр, доҕордуу дьон эбэтэр көннөрү аргыстар оннугу өссө тулуйаллар. Киһи туох да диэбэт.
Ол гынан баран, оҕолоох ыал дьону ыраах айаҥҥа тус-туһунан олортохторуна, олус эрэйдээх буолааччы. Холобур, Дьокуускайтан Москубаҕа диэри инньэ алта чаастан ордук кэм устатыгар биирдээх-иккилээх эбэтэр арыый орбургу да оҕону балачча ньээҥкэлэһэн тиийиэххэ наада эбээт. Оннукка соҕотох буолар - сылаалаах. Киһи эрэ тулуйбат. Оҕо сүгүн олорботуттан, арыт ытыырыттан-соҥууруттан, туора дьон да эрэйдэнэр.
“Известия” суруйарынан, ити кыһалҕа өтөр быһаарыллыах курдук. Ол курдук, Судаарыстыбаннай Дуума РФ Салгын кодексыгар “Арассыыйа көтөр хампаанньаларыгар сөмөлүөккэ дьиэ кэргэни арааран олордору бобор туһунан” уларытыыны киллэрэргэ ылсыбыт. Онтон олоххо төһөтө киирэрин өтөр билиэхпит.
Хаартыска: "Новый очаг" саайтан
