СӨ Киин быыбардыыр хамыыһыйата быыбар күн киһи пропискалаах сириттэн атын сиргэ сылдьар буоллаҕына, хайдах куоластыыры, быыбарга кыттары быһаарда.
Быйыл кулун тутар 15, 16 уонна 17 күннэригэр дойдубут бэрэсидьиэнин быыбара буолар. Оттон ити күннэргэ пропискалаах сирдэриттэн атын сирдэргэ сылдьар дьон, холобур, киһи ханна эрэ кэлбит-барбыт, командировкаҕа сылдьар, дьиэтиттэн тэйиччи үөрэнэр буоллаҕына, “Мобильный избиратель” көмөтүнэн туһаныан сөп. Ити мэхэниисими хайдах туһанары СӨ КБХ сэкирэтээрэ Алла Самойлова маннык быһаарар.
“Мобильный избиратель” мэхэниисим интэриниэттээх көмпүүтэртэн эбэтэр смартфонтан бэрт судургутук киһи ханна сылдьарынан куоластыырга (по месту нахождения) сайабылыанньаны ыытарга көмөлөһөр. Ити ньыманан туһанарга, быыбардааччы “Госуслуги” порталга тус сирэйигэр киирэр, “Выборы” салааны талар уонна онно быыбардыан баҕарар учаастагын ыйар. Сайабылыанньаны кулун тутар 11 күнүгэр диэри хаалларыахха сөп”, – диэн Алла Самойлова быһаарар.
Киһи баар буолар сиригэр куоластыыр туһунан сайабылыанньаны территориятааҕы хамыыһыйаҕа олохтоох бириэмэнэн 14.00 чааска диэри биэриэн сөп (кулун тутар 6 күнүттэн – учаастактааҕы хамыыһыйаҕа). Эбэтэр МФЦ-га биэрэллэр: “Өскөтүн быыбар кэмигэр киһи атын эрэгийиэҥҥэ сылдьар буоллаҕына, олохтоох хамыыһыйалар үлэлиир чаастарын чопчулуон, булгуччу пааспардаах буолуон наада”, – диэн А.Самойлова чопчулаата.
Бүгүҥҥү туругунан, тыһыынчаттан тахса Саха сирин олохтооҕо атын сиртэн куоластыыр былааннаах. Онтон 800-тэн тахса киһитэ сайабылыанньатын “Госуслуги” портал нөҥүө биэрбит.
Бэй.кэр.
