Саха сиригэр 35 үөрэх кыһатыгар демонстрационнай эксээмэни ыытарга аныгы тэрилинэн хааччыллыылаах 130 киин тэриллибитэ. Эксээмэннэри тутуу муус устар 22 күнүттэн саҕалаан бэс ыйын 29 күнүгэр диэри салҕаныаҕа. Быйыл барыта 3,2 тыһыынча бүтэрээччини хабыахтара.
Санатар буоллахха, Ил Дархан Айсен Николаев үөрэтии таһымын үрдэтэр уонна оробуочай идэлэргэ ыччаты тардар туһугар демонстрационнай эксээмэни 100 баалга туттарбыт колледж уонна техникум устудьуоннарыгар 100 тыһ.солк. төлүүр туһунан Ыйаах таһаарбыта. Маннык төлөбүр кинилэри бэлэмнээбит педагогтарга эмиэ ананар.
2017 сылтан саҕалаан демонстрационнай эксээмэни 7 тыһыынчаттан тахса устудьуон туттарда. Эксээмэни туттарбыт киһиэхэ «сатабыл сыыппара пааспара» диэн элэктириэн докумуону туттараллар. Ону көрөн үлэҕэ ылааччы кинини сыаналыыр уонна үлэҕэ ыҥырар.
Сонун төрдө: СӨ Бырабыыталыстыбатын уонна Ил Дарханын пресс-сулууспата
