Бүтүн Арассыыйатааҕы «Юнармия бастыҥ дьиэтэ» көрүү-күрэс түмүгүнэн, Мэҥэ-Хаҥалас улууһун «Кэрэли» оҕону эбии үөрэхтээһин киинин иһинэн тэриллибит Эдэр армеецтэр дьиэлэрэ 203 баалы ылан муҥутуур кыайыылаах буолла. Иккис миэстэни – Кемеровскай уобалас (193 бааллаах), үһүс миэстэни – Москуба уобалаһын (191 бааллаах) эдэр армеецтэрин дьиэлэрэ ыллылар.
СӨ Бырабыыталыстыбатын бэрэссэдээтэлин солбуйааччы Ольга Балабкина иһитиннэрбитинэн, олунньу 1 күнүгэр саҕаламмыт күрэскэ Арассыыйа 25 субъегыттан барыта 64 Эдэр армеецтэр дьиэлэрэ кыттыбыт. Дьүүл сүбэтэ дойдуга бэриниилээх буолуу хайысхатыгар ыытыллар үлэни, хабыллыбыт оҕо ахсаанын, сырдатар-иһитиннэрэр эйгэлэргэ тахсыыны, тэрээһиннэри ыытыыны учуоттаабыт.
Маны таһынан, Сэбиэскэй Сойуус Дьоруойа Н.С. Степанов аатынан Бүлүү 3 №-дээх орто оскуолатын Эдэр армеецтэрин дьиэтэ 25 бастыҥ тэриллии ахсааныгар киирдэ.
Сонун төрдө: СӨ Бырабыыталыстыбатын уонна Ил Дарханын пресс-сулууспата