Ил Түмэн дьокутааттара бэйдиэ сылдьар кыыллары бэрээдэктиир туһунан сокуон бырайыагын бастакы ааҕыыга биир сүбэнэн ылыннылар. Ол түмүгэр, бэйдиэ ыттары быстах кэмнээх пууҥҥа уонна приюкка тутан туруоруу уонна утутуу болдьоҕо олохтонно. Онон, хаһаайына көстүбэтэх ыты тутуллуоҕуттан 30 күн ааспытын кэннэ «утутан» суох гыныахтара.
Сокуон бырайыагын ааптардара билигин өрөспүүбүлүкэ үрдүнэн кыылларга аналлаах 14 муниципальнай уонна чааһынай приют, маны таһынан 10 быстах кэмҥэ туруорар пуун баарын иһитиннэрдилэр. 2023 сыл түмүгүнэн манна 5048 кыыл киирбит, итинтэн 1730 ыт ОСВВ (отлов — стерилизация — вакцинация — выпуск) диэн дьайыы кэннэ көҥүлгэ тахсан баран хаттаан тутуллубут.
Тыа сирин уонна аграрнай бэлиитикэ кэмитиэтин бэрэссэдээтэлэ Александр Атласов этэринэн, уопсастыба ыт бэйдиэ барыытыттан уордайыыта улаатан иһэр. Ветеринария департаменын дааннайынан, 2023 сыл устата ыттар 1,7 тыһ. киһини ытырбыттар. Ону таһынан, тыа хаһаайыстыбатын кыылын 77 сэймэктээбиттэр. Маны ааһан, бэйдиэ сылдьар кыыллар өрөспүүбүлүкэ бүддьүөтүгэр аҕалар хоромньулара сыл ахсын улаатан иһэр. Тутан туруорууга быйыл 94,5 мөл. солк. көрүллүбүт.
Парламент спикерэ Алексей Еремеев ааптардарга ыам ыйын 22 күнүгэр диэри бырайыагы чочуйарга уонна салгыы иккис ааҕыыга киллэрэргэ сорудахтаата.
Маннык ис хоһоонноох сокуону Бурятияҕа, Тываҕа, Алтайга, Чукоткаҕа, в Забайкальеҕа, Астрахань уонна Магадан уобаластарыгар ылыммыттарын санатабыт.
Сонун төрдө: Ил Түмэн
Сэҥээриилэр