Муус устар 26 күнүгэр Ил Дархан Айсен Николаев «Саха Өрөспүүбүлүкэтигэр элбэх оҕолоохтору өйүүр эбии социальнай миэрэлэр туһунан» Ыйаахха илии баттаата.
Манна этиллэринэн, элбэх оҕолоохтор дьиэ-уот уонна хомунаалынай өҥө төлөбүрүгэр 30 бырыһыантан кырата суох чэпчэтии ылыахтара. Элбэх оҕолоох дьиэ кэргэнтэн сылдьар оскуола үөрэнээччилэрэ, төрөппүттэрин дохуотуттан тутулуга суох, бары босхо аһылыгынан уонна уопсастыбаннай тырааныспарга босхо айанынан хааччыллыахтара. Элбэх оҕолоохтор өйөбүл саҥа миэрэлэрин 2024 сыл балаҕан ыйын 1 күнүттэн туһаныахтара.
Биллэрин курдук, Саха сиригэр элбэх оҕолонуу үгэһэ былыргыттан баар. Билигин манна Уһук Илин элбэх оҕолоох дьиэ кэргэннэрин 1/5, ол эбэтэр 34 тыһыынчаттан тахса дьиэ кэргэн олорор. Кинилэр118 тыһыынча оҕону иитэллэр.
Сонун төрдө: СӨ Үлэҕэ уонна социальнай сайдыыга министиэристибэтэ
