РНА чилиэн-кэрэспэдьиэнэ, Энгельгардт аатынан Молекула биологиятын институтун лабаратыарыйатын сэбиэдиссэйэ Петр Чумаков хоруона вируһун омикрон штамын туһунан сырдатар.
Кини этэринэн, вирус өссө да киһи аймахха сыстан “үөрэтэрин, сиһилии билсэрин” тохтотор былаана суох үһү. Холобур, хоруона вируһун Ухань куораттааҕы штама, сүрүннээн, сааһырбыт дьону сууһарбыт эбит буоллаҕына, кэлин Британияҕа үөскээбит “альфа”, Африкаҕа тэнийбит “омикрон” штамнар киһи аймах популяциятын бары көрүҥүн – кыратыттан кырдьаҕаһыгар диэри – ыарытар кыахтаммыттар.
Быраастар этэллэринэн, омикрон вируһунан иккистээн ыалдьыбыт киһи туох да симптому билиэ суоҕун сөп: күөмэйэ да ыалдьыбат, сөтөллүбэт... Ол эрээри кини бэйэтин олус сылайбыт, сэниэтэ эстибит курдук сананар. Үгүстэр ыалдьыбыттарын билбэттэр, сылаабайдаабыттарын “хоруона дьаҥынан ыалдьыбытым содула” дии саныыллар.
Быһата, хоруона вируһа уларыйа, “сайда” тутар. Бастаан утаа хоруонанан ыалдьыбыт дьон тыҥалара сиэнэр, ойоҕостотор эбит буоллахтарына, кэлин истэрэ ыалдьар, онтон ОРВИлаабыт курдук диагностаналлар, түмүгэр тиийэн, кинилэр олус сылайбыт, күүстэрэ эстибит эрэ курдук буолаллар.
