Саха сиригэр киэҥник биллибит учуонай, уу сахалыы саҥарар-суруйар турок киһитэ Умит Шахин «Вконтакте» ситимигэр үтүө сонуну таһаарбыт.
Кини Турция Kardeş Kalemler (Бырааттыы Суруйааччылар) сурунаалларын бүтэһик нүөмэригэр «хаһан даҕаны тахсыбатах» ураты матырыйаалы, саха литературатыттан талыллыбыт айымньылар уонна научнай үлэлэр таһаарбыттарын туһунан кэпсиир.
«Күндү доҕотторум. Биир үтүө сонуммун эһиэхэ кэпсиэхпин баҕарабын. Турцияҕа хаһан да тахсыбатах үлэни бу ый ол эбэтэр 2022 сыл атырдьах ыйыгар Саха Өрөспүүбүлүкэтин 100 сылыгар анаан таһаардыбыт. Ол курдук 2007 сылтан ыла тахсар Kardeş Kalemler (Бырааттыы Суруйааччылар) сурунаал бүтэһик нүөмэригэр Саха литературатыттан талыллыбыт айымньылар уонна атын научнай үлэлэр киирдилэр. Мин саамай үөрэрим диэн, бу Саха Өрөспүүбүлүкэтин 100 сылыгар анаммыт үлэҕэ редакторынан үлэлээтим. Уонна миигин кытта чугас доҕорум Аграфена Кузьмина үлэлэстэ. Сахам дьонугар бу үлэбитин Саха Өрөспүүбүлүкэтин 100 сылыгар умнуллубат өйдөбүнньүк быһыытынан бэлэх уунарбытын көҥүллээҥ», - диэн Умит Шахин социальнай ситимигэр суруйар.
