Киирии

Киирии

От ыйын 28 күнүгэр Дьокуускай куораттааҕы национальнай гимназия дириэктэрэ Николай Константинович Чиряев ыарахан ыарыыттан 60 сааһыгар күн сириттэн букатыннаахтык күрэннэ.

Николай Константинович Чиряев

Дьокуускай куораттааҕы национальнай гимназия дириэктэрэ, философия билимин кандидата, СӨ Үөрэҕириитин туйгуна, “Саха-Азия оҕолоро” норуоттар икки ардыларынааҕы оҕо пуондатын стипендиата, “Барҕарыы” Национальнай пуонда лауреата, “Во славу и пользу республики” пуонда лауреата, СӨ Үөрэҕириитин үтүөлээх үлэһитэ.

 

Николай Константинович Чиряев бэс ыйын 10 күнүгэр 1958 сыллаахха аатырбыт педагог, Ороһутааҕы норуот педагогикатын түмэлин төрүттээччи, Саха АССР үтүөлээх учуутала, Арассыыйа айар куттаах педагогикактын Академиятын академига, Саха сирин норуодунай педагогикатын Ассоциациятын бастакы бэрэсидьиэнэ К.С. Чиряев дьиэ кэргэнигэр төрөөбүтэ.

Дойду олоҕо тосту уларыйар 90-с сылларыгар норуот сайдар суолун тобулар долгутуулаах суолугар үктэммитэ. Бу кэмнэргэ оскуолалар араас бырагырааманы киллэрэн үлэлиир кыахтаммыттара, саҥа технологиялары туһаналларыгар көҥүл ылбыттара. Инньэ гынан, уруккулуу халыыптан аккаастанан, ырыынак саҥа ирдэбилигэр сөп түбэһэр оскуолалар үөскээбиттэрэ.

1992 сыл балаҕан ыйын 1 күнүгэр Дьокуускай сахаларыгар умнуллубат устуоруйа түгэнэ үөскээбитэ: бү күн Дьокуускай куораттааҕы национальнай гимназия боруогун бастакы үөрэнээччилэрэ атыллаабыттара. Онтон ыла үйэ чиэппэрэ күлүм гынан ааһа оҕуста. Николай Константинович национальнай гимназия дириэктэринэн 1992 сыллаахха анаммыта. Оччолорго гимназия бас билэр дьиэтэ-уота суоҕа, Оҕо Дыбарыаһынан, Семен Данилов аатынан уонна Дзержинскэй, Орджоникидзе уулуссаларыгар баар оҕо уһуйааннарынан тарҕанан үөрэнэллэрэ.

Киин куоракка аан бастакы сахалыы тыыннаах эйгэни үөскэппит, оҕолор төрөөбүт тылларынан үөрэнэр кыахтарын арыйбыт саҥа үйэ оскуолата күн бүгүҥҥэ диэри биир бастыҥ үөрэх кыһатынан аатырар.Күн бүгүн Дьокуускай куораттааҕы национальнай гимназияҕа 1552 оҕо үөрэнэр, уопсайа 54 кылаас-кэмпилиэк баар. Манна 88 идэлэригэр толору бэриниилээх педагогтар үүнэр көлүөнэнин үөрэтиигэ, иитиигэ дьаныардаахтык үлэлииллэр. Поярков аатынан уулуссаҕа турар гимназия дьиэтигэр 924 оҕо үөрэнэр, манна 32 кылаас-кэмпилиэк баар. Дьокуускай куораттааҕы гимназияттан силис тардан “Айыы кыһата” уонна Саха гимназията туспа үөрэх кыһалара буолбуттара. Билигин гимназия М.К. Аммосов аатынан Хотугулуу-Илиҥҥи федеральнай университеты кытары “Сэргэлээх оскуола-лабаратыарыйа” диэн бырайыагы үлэлэтэллэр. Буолаары буолан, национальнай ыстаатыстаах аан бастакы гимназия атаҕар туруутугар бастакы уонна солбуллубат дириэктэр Николай Константинович Чиряев оруола улахан. Айылҕаттан айдарыылаах педагог, биллиилээх этнопедагогтар династияларын утумнааччы, талааннаах салайааччы Николай Константинович тапталлаах кэргэнэ Антонина Гаврильевна Чиряевалыын күннэри-түүннэри гимназия сайдар суолун торумнаабыттара. Чиряевтар өрөспүүбүлүкэ киин куоратыгар саха оҕолоро төрөөбүт тылларынан үөрэнэр таһымнаах оскуолалара баар буолуохтаах диэн биир бастакынан туруорсубуттара уонна ыһыллыы-тоҕуллуу, мунуу-тэнии кэмигэр ону олоххо киллэрбит сүҥкэн оруоллаахтар. Дьокуускай куораттааҕы гимназия -- биһиги өрөспүүбүлүкэбитигэр тэриллибит аан бастакы гимназия. Бу гимназия уопутун туһанан араас хайысхалаах оскуолалар: гимназиялар, лиссиэйдэр, Саха-француз, Саха-Бельгия, Саха-турок, Саха-Канада уо.д.а. үөскээбиттэрэ.

Николай Константинович оҕолоругар, урууларыгар, бары аймахтарыгар, кэллиэгэлэригэр, үөрэнээччилэригэр дириҥ кутурҕаммытын тиэрдэбит, аһыыгытын тэҥҥэ үллэстэбит.

Тарҕат:

Ырытыыгын суруй

Защитный код
Обновить

Бүтэһик сонуннар