Киирии

Киирии

Икки ыйтан ордук кэм устата, уоппускабытыгар, иккис дойдубут кэриэтэ буолбут ахтылҕаннаах Узбекистаммытыгар баран, астына күүлэйдээн, сынньанан кэллибит.

Үгэс буолбут айаммыт хайысхатынан Хорезм, Наманган, Фергана, Сырдарья, Джизак, Самарканд, Бухара, Навои уобаластарынан уонна Каракалпакия өрөспүүбүлүкэтинэн сырыттыбыт.

Узбекистан өрөспүүбүлүкэтигэр 2016 сыл ахсынньытыгар бэрэсидьиэнинэн Шавкат Мирзияев талыллыбыта. Кини ыытар бэлиитикэтин олохтоох нэһилиэнньэ наһаа биһирээбит, ылыммыт. Хас сылдьыбыт сирбитигэр (уобаластарга, оройуоннарга, кишлактарга) дьон санаата улаханнык көтөҕүллүбүт, саҥалара-иҥэлэрэ ньүөл, бэрэсидьиэннэрин ыытар үлэтин сүрдээҕин биһирииллэр.

Дьэ, кырдьык даҕаны, кинилэр да эппэтэхтэрин иһин, үчүгэй өттүгэр уларыйыылар бара тураллара киһи хараҕар лаппа быраҕыллар, болҕомтону тардар буолбут. “Тыйаатыр таҥас ыйыыртан” саҕаланар дииллэринии, ханнык баҕарар дойду сөмөлүөттэн түһээккин аэропортан саҕаланар. Урукку сырыыбытыгар таможняҕа кытаанах хонтуруолу ааһан, төһө суумалаах дуоллары, Арассыыйа харчытын илдьэ кэлбиккин, үрүҥ, кыһыл көмүстэргин барытын декларацияҕа толорон отчуоттуур эбит буоллаххына, билигин үөрүүгүттэн “дьиэрэҥкэйдээн” эрэ тахсыбаккын. Төһө баҕарар дуоллардаах-солкуобайдаах күннээх Узбекистан сиригэр үктэнэҕин. Бобуу-хаайыы, хааччах тохтообут. Мэлдьи сылдьар, айанныыр дьоҥҥо олус үчүгэй сонун, уларыйыы.  

Аны ханна баҕарар (ырыынакка, уулуссаларга, метроҕа, о.д.а. уопсастыбаннай миэстэлэргэ) хаартыскаҕа, видеоҕа түһэрии, устуу хааччаҕа суох буолбут. Урут Ташкент куорат метротын хаһан да уһултарбаттара. Аны уулуссаҕа уста сырыттаххына, хас хардыыҥ аайы кыраҕытык маныыр милииссийэлэр, хантан кэлбиттэрэ биллибэккэ аттыгар баар буола түһэллэрэ уонна хаартыскаҕа түһэрэр, видеоҕа устар көҥүллэммэтин быһаараллара. Онно холоотоххо билигин – көҥүл олох тыына, салгына бэркэ биллибит.

Урукку бэрэсидьиэн Ислам Каримов саҕана бэлитиичэскэй матыыбынан хаайыллыбыт, маны тэҥэ дойдуларыттан омук сиригэр куотан тиийэн олохсуйбут Узбекистан олохтоохторо дойдуларыгар төннөн кэлэллэригэр көҥүл бэриллибит, дьон сыыйа-баайа төннөн эрэллэр үһү.  

Узбекистаҥҥа 12 уобалас, 120 оройуон, 115 куораттыы тииптээх бөһүөлэктэр уонна Каракалпакия автономнай өрөспүүбүлүкэтэ (1 мөл. 842 тыһ. нэһилиэнньэлээх) баар.

Узбекистан нэһилиэнньэтэ 2018 сыл алтынньы 1-кы күнүнээҕи туругунан – 33 085,2 киһи. Нэһилиэнньэ ахсаанын 82%-нын олохтоох омуктар – узбектар, иккис миэстэни (4,8%-ны) таджиктар ылаллар. Нуучча баара-суоҕа нэһилиэнньэ 2,6 %-нын эрэ ылар. Өрөспүүбүлүкэ киин куоратыгар – Ташкеҥҥа 2 мөл. 400 тыһ. киһи олорор. Нэһилиэнньэ 95%-на – ислам итэҕэллээх. Урукку ССРС дойдуларыгар, нэһилиэнньэтин ахсаанынан Арассыыйа уонна Украина кэнниттэн 3-с миэстэҕэ турар.

“Манас” кишлага – 45 хонук иһигэр

1 Манас

Өрөспүүбүлүкэ бэрэсидьиэнэ Шавкат Мирзияев “Бөһүөлэги тупсаран оҥоруу” (“Обод кишлок”) бырагырааматынан бу сыл олунньу, кулун тутар ыйдарга Джизак уобалаһын Дустлик оройуонун Манас кишлагын 45 хонук иһигэр киһи билбэт гына уларытан оҥордулар. Оройуон кииниттэн саамай ыраах сытар, ааспыт үйэ 60-с сылларыгар истиэп кумах куйаарыгар тутуллубут кишлакка 6,5 тыһыынча киһи олорор. Манна 20-чэ араас омук түөлбэлээн олорор, олортон 80 %-на этническэй кыргызтар.

Ол курдук, балтараа ый устата 6,5 килэмиэтир уу ситимин тарпыттар, ууну бааһына учаастактарыгар тиэрдэргэ тардыллыбыт турбалар, хоруулар, 34 иккилии этээстээх дьиэлэр сарайдара, 2 орто оскуола, 500 миэстэлээх “Манас” култуура Дыбарыаһа өрөмүөннэммит. 17 оҕо оонньуур былаһаакката, 250 миэстэлээх мини-путбуол стадион, 30 тэпилииссэ, 100 ынах сүөһү саҥа пиэрмэтэ, 30-ча маҕаһыын, бэкээринэ уонна баанньык тутуллан үлэҕэ киирбит. Урут амбулатория эрэ баар эбит буоллаҕына ол билигин дьиэ кэргэн поликлиниката буолбут. Кишлак дьахталларын үлэнэн хааччыйар сыалтан 2 иистэнэр сыах арыллан 120-чэ дьахтар үлэнэн хааччыллыбыт. Эргэ дьиэлэри барытын күртэрэн 2-лии этээстээх толору хааччыллыылаах дьиэлэри тутан кишлак киһи билбэт буола уларыйбыт.

Биһиги олоро сылдьыбыт сирбитигэр эмиэ 2-лии этээстээх дьиэлэр аттыларыгар дьон бэйэтин дьаалатынан туттубут эбии тутууларын (дьиэҕэ эбии тутуулары, лэппиэскэ буһарар тандырдары, о.д.а. хаһаайыстыбаннай тутуулар) барытын күртэрэ сылдьалларын илэ харахпытынан көрдүбүт.

Маннык нэһилиэги аныгылыы көрүҥнээн тупсарыы үлэтэ 2-3 сыл ыытыллан бүтүөхтээх эбит. Онон бэрт бэлиитикэ ыытыллан эрэрин биһирии көрдүбүт.

21-с үйэҕэ – буржуйка оһох

2 Буржуйка оьох

Ол эрэн... Дьиэни ититии кыһалҕата билигин даҕаны олус сытыытык турар. Сэбиэскэй Сойуус саҕана Арассыыйа сылаас хонноҕун анныгар олорон Узбекистан нэһилиэнньэтэ улахан аҥаара айылҕа гааһынан толору хааччыллан олорбут эбит буоллаҕына, тутулуга суох судаарыстыба буолуоҕуттан үгүс уобаласка, ордук Фергана хочотугар, гаастарын быһан кэбиспиттэрэ ырааппыт. Нэһилиэнньэ гаас боллуонунан эбэтэр таһырдьа “учахха” (оһоххо) уот оттон, онно астанан олороллор. Саатар, бары улахан баҕайы дьиэни туойтан сыбаан-самаан туталлар. Кыһыҥҥы өттүгэр маннык дьиэлэр, ититэр батарыайата суох буоланнар, лаппа тымныы буолаллар.

Ол түмүгэр хас биирдии ыал буржуйка оһоҕунан сылытынар – ону хлопок ыарҕатынан, бараан, сүөһү киитинэн (кизяк), таас чоҕунан эбэтэр гаас боллуонунан оттуналлар. Биһиги сылдьыбыт ыалларбыт үксүлэрэ буржуйка оһоҕунан сылытыналлар этэ. Гаас боллуонунан дьиэлэрин сылытынааччылар да бааллар. Ол түмүгэр ыал ыалынан гааска угаардыыр түбэлтэлэрэ тахсаллар эбит. Холобур, биһиги дойдубутугар кэлиэхпит эрэ иннинэ Ташкент куоратын Чиланзар оройуонугар биир ыал 4 оҕото (6-тан 22-гэр диэри саастаахтар) түүн утуйа сытан гааска угаардаан суорума суолланнылар. Ол өлбүт 22 саастаах кыыстара сэтинньи бүтэһигэр кэргэн тахсар сыбаайбата буолуохтаах эбит. Маннык гааска угаардааһын түбэлтэтэ тымныы саҕаланнаҕына элбэхтик тахсар.

Олохтоох омуктар – тас дойдуга үлэлииллэр

Общий фон

Орто Азия дойдуларыттан миграция Узбекистантан саамай үрдүк. Дьон тас омук дойдуларыгар тахсан үлэлиир. Ол курдук, Арассыыйаны таһынан, үгүстэрэ Турцияҕа, Эмиэрикэҕэ, Кэриэйэҕэ, Швецияҕа үлэлииллэр. Самарканд куораттан ордук АХШка баран үлэлииллэр эбит. Онно баран 5-10 сыл үлэлииллэр. Дойдуларыгар 5-6 сыл устата кэлбэттэр. Онон оҕолор барахсаттар үксүгэр толорута суох дьиэ кэргэн эйгэтигэр улааталлар, эбэ-эһэ иитиитигэр сылдьаллар. Аҥаардас Арассыыйаҕа 3,5 мөлүйүөн Узбекистан олохтооҕо үлэлиирэ биллэр.  

Таксиһынан үлэлиир Анвар Тошматов кэпсиир:

“Мин кыргыттарым уонна чугас аймахтарым Эмиэрикэҕэ үлэлии тахсар буолбуттара ыраатта. Ташкент куораттан Эмиэрикэҕэ диэри 16 чаас көтөллөр. Кыыһым ыалга оҕо көрөөччүнэн үлэлиир, ыйга 6000 дуоллар хамнас ылар, онтон 2000 дуоллары дьиэ куортамыгар төлүүр. Биир чааска оҕону көрөргө 20 дуоллары төлүүллэр. Күнү быһа, 10 чаас көрдөҕүнэ, 100 дуоллары ылар. Манна дойдубутугар үлэ суох. Үөрэхтээх эрэ дьон үлэлээх. Ол иһин билигин төрөппүттэр балысхан харчыны төлөөн туран оҕолорун үөрэттэрэллэр”.

Дьэ, кырдьык, тас дойдуларга тахсан үлэлээн киирбит уонна үлэлии сылдьар дьон дойдуларыгар сүрдээх үчүгэй дьиэлэри тутталлар, массыына үөһэ массыына ылынан бэрт кыахтаахтык олороллор. Харчыны сатаан уурунан сатабыллаахтык дьаһанан туттан-хаптан олороллорун тус бэйэм хас бардаҕым аайы аһара сөҕө-махтайа көрөбүн.

“Мардикордар” элбэхтэрэ сөхтөрдө

3 Мардикоры Узбекистана

Бу кыһалҕа ордук Фергана, Андижан уонна Наманган уобаластарыгар (Фергано хочотугар) баар. “Мардикордар” диэн уулуссаҕа тахсан күнүнэн наймылаһан үлэлээччилэри ааттыыллар. Онон олохтоохтор саамай улахан кыһалҕалара – үлэ суоҕа.

Сарсыарда ааттаах эрдэ уулуссаларга дьахталлар (эр дьон эмиэ баар буолар) тоҕуоруһан туралларын үгүстүк көрөөччүбүт. Ону интэриэһиргээн ыйыппыппытын, бэйэлэрэ этэллэринэн “левактар” эбит. Ордук оҕуруот аһа, хлопок хомуурун кэмигэр мардикордар элбииллэр. Билэр дьоммут ириис олордоллор. Күн аайы мардикор-дьахталлар мустар сирдэригэр тиийэн, сорох күн ытыстарын соттон кэлэллэр. Үлэлэтиэн баҕалаах дьон сарсыарда эрдэттэн кэлэн элбэх харчыны сыҥалаан илдьэ баран иһэллэр эбит. Онон мардикордар күҥҥэ 400-500 солк. (40, 50 минг сум) бааһынаҕа баран ириис, горох, луук, о.д.а. оҕуруот аһын хомууругар бараллар. Маны сэргэ, дьиэҕэ-уокка, сыбаайбаларга, үбүлүөйдэргэ, о.д.а. тэрээһиннэргэ “мардикордар” тоҕуоруһар сирдэригэр бардаххына, күнүнэн үлэһити тута булаҕын.

Дьаабылыка саада – ырай олоҕо

Яблоко саада

Джизак уобалаһын Бахмал оройуонун Аккурган кишлагар хайалаах сиргэ олорор дьүөгэбитигэр ыалдьыттаатыбыт. Тиэргэнин иһэ – дьаабылыка саада. Мастар барахсаттар астарын уйбакка сиргэ тиийэ намылыспыттара – көрүөххэ эриэккэс, аны сибиэһэй дьаабылыка сыта-сымара... Маннык ырай саадыгар сылдьан олох биир кэрэ эйгэтигэр киирэн ылаҕын. Көрбүккүттэн дьоллоноҥҥун ытыаххын да, ыллыаххын да билбэккин. Дьүөгэбит Дильфуза Бекжанова 1 гектар сиригэр 250-ча дьаабылыка маһа баар, манна дьаабылыка 5 суорда үүнэр. Көрдөххө, улаҕата биллибэт киэҥ сиринэн тайаан сытар, киэҥ да киэҥ. Биһиги сылдьар кэммитигэр, алтынньы ый саҕаланыыта, дьаабылыка хомуура саҥа саҕаламмыт кэмэ этэ. Хаһаайыттар бэйэлэрин күүстэринэн хомуйар кыахтара суох буолан, тастан дьону күнүгэр 400 солк. кэриҥин төлөөн хомуйтараллар. Төһө да көстүүтэ кырасыабайын иһин, хомуурун үлэтэ ыарахан эбит. Биһиги хомуйан боруобалаары гынан баран, быыла бэрдиттэн салынныбыт. Маска хатаастан туран сорох солуурга, сорох баартык кэтэн туран хомуйаллар.

Манна хас биирдии ыал барыта дьаабылыка маһа үүнэр саадтаах. Биир ыалдьыттаабыт дьиэбит хаһаайката Наргиза Ахмаджанова кэпсиир “80-ча дьаабылыка үүнэр мастаахпын. Быйыл үүнүү олох үчүгэй. Дьаабылыка араас суордун үүннэрэбин. Олортон саамай минньигэстэрэ “Биэс сулус” (“Беш юлдуз”) диэн ааттаах, кримсон суортаах кыһыл дьаабылыка. Бу дьаабылыканы аллараа өттүн түгэҕин өйдөөн көрөөрүҥ эрэ, биэс сулус курдук быһыылаах. Дьэ, бу дьаабылыкалартан саамай минньигэстэрэ. Сылга 60 туонна кэриҥин хомуйабын. Харчытыгар таһаардахха, 800 тыһ. солк. суумалааҕы атыылыыбын. Үксүн кууһунан атыылаһааччылар кэлэн ылан бараллар. Дьаабылыка 1 киилэтин 20-25 солк. атыылыыбыт. Хойуутук, үчүгэйдик үүммүт сылыгар мантан олох чэпчэкигэ эмиэ атыылааччыбыт.

Дьэ, оҕуруот сыаната төһө эбитий?

5 фрукта сыаната

Саха сиригэр кэллэҕинэ, бары да саамай сөбүлээн сиир хурмабыт манна босхону эрэ үрдүнэн атыыланар. Олохтоохтор аанньа ахтан, маанылаан сиэбэт астара эбит. Сэтинньи ый ортотун диэки ситэрин чугаһыгар кытаанах хурманы ыаллары кэрийэ сылдьан хомуйан, Арассыыйаҕа контейнердаан ыыталлар. Сотору кэминэн, ахсынньы ыйга, Дьокуускай куораппытыгар атыыга тахсыаҕа. Хурма киилэтэ – кинилэр харчыларынан 500 сум, ол эбэтэр, биһиги харчыбытынан – 4-5 солк. Саха сиригэр кэллэҕинэ эн уонна мин 1 киилэтин – 200-250 солк. атыылаһан сиибит. Дьэ, баһырхай сыананы эбэллэр эбит дии санаабаккыт дуо?

 

Мантан аллараа биһиги харчыбытынан олохтоох сыананы кытта билсиҥ:

50 кг бурдук – 950 солк.

Килиэп – 10 солк. (бу балаҕан ыйыгар үрдээбит сыананан).

Виноград – 20-30 солк. (кг)

Дьаабылыка – 20-25 солк. (кг)

Луук – 8 солк. (кг)

Хортуоппуй – 10-15 солк. (кг)

Чосунуок – 1 киилэтэ 100 солк.

Моркуоп – 15-20 солк.(кг)

Ынах этэ – 400-450 солк. (кг)

Бараан этэ – 420 солк. (кг).

“Хара ырыынакка” валютаны уларытар судургу, барыстаах

2017 сылга валютаҕа сыһыаннаах анал сокуон тахсан, “хара ырыынакка” дуоллары олохтоох харчыга – сумҥа – уларытар сэрэхтэммит. Кэтиир-хонтуруоллуур уорганнар өттүлэриттэн бэрэбиэркэ сотору-сотору ыытыллан, “валютчиктары” кытаанах эппиэккэ тардар буолбуттар. Сүрүн ирдэбил – дуоллары судаарыстыбаннай бааннарга эрэ уларытаҕын. Ол эрээри, баан дуоллары сумҥа уларытан биэрэр сыаната лаппа намыһах.

Онон, мэлдьи да буоларын курдук, биһиги дуолларбытын үксүн “хара ырыынакка” тиийэн олохтоох харчыга уларытан сырыттыбыт. Ол иһин дьон үксэ маннык ырыынактарга кэлэн дуоллардарын уларыталлар. Бу содулугар бааҥҥа харчы улаханнык эргийбэккэ, нэһилиэнньэ илиитигэр сылдьар. Ол да иһин араас биэнсийэ, босуобуйа, хамнас барыта карточкаҕа түһэн, уу харчынан бэриллибэт. Баһаар – харчы саамай эргийэр киинэ, дьон суумканан харчыны үллэҥнэтэр.

Арассыыйа солкуобайын, казахстан “тенгетин”, таджик “сомонитын” ханнык да бааҥҥа уларыппаттар. Оннук атастаһар пууннар төрүкү суохтар. Онон дойдугуттан тута дуоллардаах барбытыҥ ордук курдук. Бу дойдуга барыан сананар дьоҥҥо сүбэлиир кэриэтэ этэбин.

Биэнсийэлээхтэргэ ыйга “180 солк. килиэп харчыта эбиллэр”

2018 сыл сэтинньи 1-кы күнүттэн, хамнас, биэнсийэ, истипиэндьийэ уонна бэриллэр босуобуйалар 10 % үрдээтэ. Узбекистаҥҥа хамнас төлөбүрүн алын кээмэйэ – 2000-тан тахса солк. (бу иннинэн 184 тыһ. солк. кэриҥэ этэ) бигэргэннэ.

Маны сэргэ, 3000-тан тахса биэнсийэни (368 минг сум) ылар дьоҥҥо “килиэп харчыта” (“нон пули”) диэн ыйга биһиги харчыбытынан 180 солк. (180 сум) эбиллибит. Дьон-сэргэ ону “күлүү гыммыкка дылы харчы эбиллибит, биһиги ити харчыга аҕыйах устуука эрэ лэппиэскэни атыылаһар кыахтаахпыт” диэн сонньуйаллар, хомойоллор. Ол эрээри, элбэх үлэ ыстаастаах уонна үчүгэй хамнаска сылдьыбыт биэнсийэлээхтэр саамай элбээбитэ 10 000 солк. кэриҥин ылаллар эбит. Мин санаабар, куһаҕана суох биэнсийэ курдук.

Сэтинньи ыйтан төлөбүр кээмэйдэрэ улааппытынан сибээстээн, үрдүк үөрэх кыһаларыгар төлөбүр эмиэ ыараата. Саамай чэпчээбитэ – 90 000 солк., ыараабыта 200 000-250 000 солк. кэриҥэ буолбут. Ити – биһиги харчыбытынан суоттаатахха. Бу кып-кыра хамнастаах, биэнсийэлээх дьоҥҥо сөҕүмэр, санаалара да кыайан тиийбэт сыаната. Хомунаалынай өҥө үрдээбитин этэ да барыллыбат. Онон дьон “олохпут күн-түүн ыараан иһэр” диэн эмиэ да муҥатыйаллар.

Уопсайынан эттэххэ, Узбекистаҥҥа сыана үүнэ-тэһиинэ суох ыараабыт. Үксүлэрэ бэйэлэрэ оҕуруоттаах, кэтэх хаһаайыстыбалаах эрэ буолан тулуһан олороохтууллар.

Ороскуоттаах сыбаайбаны сокуонунан боптулар

6 Сыбаайба

Орто Азия дойдулара урут уруккуттан сыбаайбаны улахан ньиргиэрдээхтик, ороскуоттаахтык тэрийэн ыыталларынан аатыраллар. Баҕар, ол сөбө да буолуо, ол дьонуҥ арахсыбат-хайаабат, “букатынныы” кэриэтэ холбоһор дьон буоллахтара.

Быйыл сыл саҕаланыытыгар бэрэсидьиэн Ш.М. Мирзияев сыбаайбалары аҕыйах ороскуоттаах гына ыытарга дьаһал таһаарбыт. Онно Шавкат Миромонович этэн турар: “Биһиги таһаарбыт ирдэбилбитигэр сөп түбэспэт сыбаайбалары ыыппыт оройуон баһылыга, ЗАГС салайааччыта уонна эдэрдэр эппиэтинэскэ тардыллыахтара”, – диэн. Онон эдэрдэри регистрациялаабыт ЗАГС салайааччыта кинилэргэ ыал буолбуттарын туһунан докумуону туттарыынан эрэ муҥурдаммат, эбии ыытар сыбаайбаларын хонтуруоллуур эбээһинэстэнэр.

Ол курдук, сыбаайбалар киэһэ 11 чааска диэри эрэ эрэстэрээннэргэ, кафеларга ыытыллар көҥүллээхтэр. Сыбаайбаҕа ыҥырыллыбыт киһи ахсаана 200-300-тэн элбиэ суохтаах. Эдэр дьону 1-2 эрэ массыына арыаллыахтаах, сыбаайбаҕа 1-2 эрэ ырыаһыт, мусукаан баар буолара ирдэнэр.

Баҕар, сорох киһи маннык дьаһаныыны өйдүө суоҕун сөп. Ону быһаарар буоллахха, сыбаайба Узбекистаҥҥа сарсыарда 6 чаастан “сарсыардааҥҥы плов” (“нахор оши”) диэнтэн саҕаланар. Манна махалла эр дьоно сылдьаллар (анаан ыҥырбаттар, баҕалаах бары сылдьар). Онтон 9 чаастан дьахталларга саҕаланар. Киэһэ эрэстэрээн сыбаайбата буолар. Күнү быһа бу тэрээһиҥҥэ 1000-тан тахса ыалдьыт аһаан-сиэн барар. Онон бэрт улахан ороскуоттаах сыбаайба буолан тахсар.

Маны сэргэ, бу омуктарга уол оҕону дьиҥнээх эр киһи оҥорон (обрезание) улахан “сыбаайба” (“туй”) тэрийэллэр. Манна кырата 600-тэн тахса киһи сылдьар. Маннык тэрээһиннэргэ элбэх бэлэх бэриллэр (бытовой тиэхиньикэ, дьиэ кэргэн хас биирдии чилиэнигэр таҥас-сап, ас-үөл, о.д.а.). Оттон кыһыл оҕону биһиккэ сытыарыы сиэрэ-туома, оҕо үөрэххэ киириитин бэлиэтээһин, о.д.а. дьиэ кэргэни солуута суох улахан ороскуокка тэбэр тэрээһиннэр аһара элбэхтэр. Ону барытын биһиги илэ харахпытынан көрө сылдьар буоламмыт бэркэ билэбит. Онон эмиэ да бириэмэтигэр ылыллыбыт сөптөөх дьаһал диэн сыаналыыбыт.

Колледж оннугар – орто үөрэхтээһин

1993 сылтан узбек тылын алпаабытын “нууччалыыттан” латыынныыга көһөрбүттэр. Онон кэнники көлүөнэ ыччат кириллицанан букатын да сатаан суруйбат. Оскуолаларга нуучча тылын аҕыйах эрэ чаас үөрэтэр буоланнар, аныгы ыччат нууччалыы тамты өйдөөбөт.

Быйыл сыл саҥатыттан анал ыйаах тахсан, 9-с кылаастан колледжка салгыы үөрэнии суох буолбут. Үгүс оскуола орто уопсай үөрэхтээһин бырагырааматыгар көспүттэр. Онон оҕо да, төрөппүт да бу уларыйыыны үөрэ-көтө ылыммыт.

 

Саргылаана БАГЫНАНОВА.

Саха сирэ-Узбекистан.

Тарҕат:

Комментарии

Защитный код Обновить