2016 сыл бэс ыйын 1 күнүттэн Саха сиригэр “Уһук Илиҥҥи гектары” ылыыга 7,6 тыһ дуогабар оҥоһуллубут. Бу туһунан СӨ баай-дуол уонна сир сыһыаннаһыыларын миниистирин солбуйааччы Ньургустана Пахомова иһитиннэрдэ.
“2018 сыл түмүктэниэр диэри 7,6 тыһ дуогабар түһэрилиннэ. Олортон улахан аҥаара өрөспүүбүлүкэ олохтоохторо. Атын эрэгийиэннэртэн 75 сайабылыанньа киирдэ. 2019 сыл бэс ыйыттан сири туһаныы декларациятын тутан саҕалыахпыт”, – диэн эттэ.
Ону таһынан, кини этэринэн түөрт пилотнай учаастак быһаарыллыбыт. Манна сир учаастактарын инфраструктурата: массыына суола, уот, сорох сирдэринэн гаастааһын киирэрэ былааннанар.
“Уһук Илиҥҥи гектар” бырагыраамма көмөтүнэн дойду олохтоохторо 1 гаҕа диэри иэннээх сир учаастагын босхо ылар кыахтаахтар. Бу бырагыраамма Уһук Илиҥҥи эрэгийиэҥҥэ 2016 сыл бэс ыйын 1 күнүттэн олоххо киирбитэ. Оттон атын эрэгийиэннэргэ 2017 сыл олунньу 1 күнүттэн үлэлиир. Сир ылбыт киһи бастакы сылыгар сирин хайдах туһанарын быһаарар. Онтон үс сылынан декларация туттарар. Биэс сылынан сири бас билиитигэр оҥотторуон сөп. Эбэтэр уһун болдьоххо арендаҕа ылар кыахтаах.
