Киирии

Киирии

Абый сэлиэнньэтигэр саҥа оскуола үлэҕэ киирдэ. Киэҥ-куоҥ, сырдык саҥа таас оскуола арыллан кэлэктиип, оҕолор уһун сылларга күүппүт ыра санаалара туолла.

Олунньу 26 күнүгэр Абый нэһилиэгэр 90 миэстэлээх саҥа таас оскуола дьиэтин үөрүүлээхтик аһыы сиэрэ-туома ыытылынна. Кырдьаҕас Абый хас биирдии олохтооҕун өйүгэр санаатыгар өтөр-наар умнуллубат ураты түгэни бэлиэтииргэ ыраахтан-чугастан ыалдьыттар тоҕуоруһа муһуннулар.

Бүгүҥҥү күн үөрүүтэ дьоҕус нэһилиэк эрэ үөрүүтүнэн муҥурдаммат, кини бүтүн оройуон, өрөспүүбүлүкэ дьоро күнүнэн бэлиэтэнэр. Санаан да көрдөххө, кый ыраах сытар хоту оройуоҥҥа үп-харчы кырыымчык кэмигэр икки этээстээх аныгы ирдэбилгэ толору эппиэттиир таас оскуола тутуллуута үтүмэн үлэттэн тахсар. Ол иһин Абыйтан силистээх тэхиньичэскэй билим доктора А.Е. Слепцов аатынан орто оскуола аанын тэлэччи аһарыгар маҥнайгы акылааты түһэрбит судаарыстыбаннай уопсастыбаннай деятель В.П. Ефимов аата дорҕоонноохтук ааттанна.

СӨ Арктика дьыалаларыгар мииниистирэ Александр Саввинов, «Фонд будущих поколений» тэрилтэ генеральнай дириэктэрэ Сергей Местников, СӨ үөрэҕин уонна наукатын миниистирин I-кы солбуйааччыта Ирина Любимова,«Хотугу сулус» уордьан кавалера, норуот хаһаайыстыбатын үтүөлээх үлэһитэ Будимир Слепцов о.д.а. эҕэрдэ тылларыгар саҥа оскуола тутуллуута оройуон социальнай-экэнэмиичэскэй сайдыытыгар кэскилгэ хардыы диэн тоһоҕолоон бэлиэтээтилэр.

Оскуола символическай күлүүһүн «Тутуу дирекцията» ХЭТ генеральнай дириэктэрэ Сергей Никитин оскуола дириэктэригэр Раиса Владимировна Бережноваҕа туттарда. Ити кэнниттэн Виктор Петрович сүүрбүт-көппүт кырдалыгар тутуллубут оскуола эркинигэр киниэхэ аналлаах мемориальнай дуосканы СӨ Доруобуйа харыстабылын туйгуна Антонина Ефимова аста. Оройуон баһылыга Станислав Цюхцинскай, нэһилиэк баһылыга Тимофей Томскай, дириэктэр Раиса Бережнова оскуола тутуутугар кылааты киллэрбиттэргэ махтаннылар, билии храма сырдык тыыннаах, үтүө куттаах буоллун диэн баҕа санааларын тиэртилэр.

Афанасий Иванов

Тарҕат:

Комментарии

Защитный код Обновить

Бүтэһик сонуннар