Бүлүү улууһун Сосновкатыгар үлэлиир Кэт Марсден аатынан психоневрологическай интернат саҥа 150 миэстэлээх, толору хааччыллыылаах, таас утуйар корпуһун тутуута федеральнай бүддьүөттэн үбүлэнэрэ быһаарылынна. Ил Дархан Айсен Николаев социальнай эбийиэк тутуутун ситистэ.
Сосновкаҕа тутуллуохтаах эбийиэккэ анаан федеральнай киинтэн 264,5 мөл солк харчы көрүлүннэ. Арассыыйа бырабыыталыстыбатын бэрэссэдээтэлэ Дмитрий Медведев дьаһалыгар өрөспүүбүлүкэ бырабыыталыстыбата саҥа корпуһу 2021 сылга үлэҕэ киллэрэригэр соруйда. Тутуу министиэристибэтин Судаарыстыба сакааһын сулууспата бу тутууга анаан тендер биллэрбитэ. “КИНГ-95” тэрилтэ куоҥкуруска кыттан, кыайыылааҕынан таҕыста.
Муус устар 25 күнүгэр тэрилтэ салалтата Сосновкаҕа кэлэн миэстэтигэр үлэни, балаһыанньаны билистэ. Бүлүү улууһун баһылыгын бастакы солбуйааччы И.И.Евсеев, Кэт Марсден аатынан психоневрологическай интернат дириэктэрэ К.А.Корякина, Бүлүү куорат дьаһалтатын тутууга эппиэттээх үлэһиттэрэ уонна тутуу министиэристибэтиттэн Судаарыстыба сакааһын сулууспатын техническэй салаатын эппиэттээх үлэһитэ К.Н.Хоютанов, “КИНГ-95” тутуу тэрилтэтин салайааччылара туох үлэ ыытыллыахтааҕын сүбэлэстилэр, бастакы “көмүс” сыбаайаны түһэриини үөрүүлээх быһыыга ыытарга быһаардылар уонна үлэни былааннастылар. Интернат дириэктэрэ Клеопатра Автаномовна өр сылларга туруулаһан туран туруорсубут баҕата олоххо киирэн эрэриттэн долгуйа үөрдэ.
Ulus.media
