Ыам ыйын 21 күнүгэр самаан сайыны көрсө “Айыы кыһата” национальнай гимназия тиһэх чуораана чугдаарда. Сахабыт норуотун туһугар туруулаһа үлэлиир үөрэх кыһата сырдыкка уһуйбут, бүөбэйдээн улаатыннарбыт VIII-с выпуһун, 48 үөрэнээччитин олох киэҥ аартыгар атаарда.
Бу дьоллоох, долгутуулаах күҥҥэ Набережнай уокурук Ил Түмэҥҥэ дьокутаата Мария Николаевна Христофорова выпускниктарга истиҥ эҕэрдэтин эттэ уонна ситиһии аргыстаах оҕолорго Илларионов Григорийга, Шамаев Айталга, Лепчикова Мичийээнэҕэ, Коротких Иннаҕа, Егорова Маринаҕа, Мигалкин Александрга, кылаас салайааччыларыгар О.П.Сухариноваҕа, Н.Н.Никулинаҕа, ону тэҥэ оскуола дириэктэригэр Л.П.Шамаеваҕа махтал суруктарын, сэмэй бэлэхтэрин туттарда.
-- Күндү үөрэнээччилэр, ытыктабыллаах учууталлар, оҕолорунан киэн туттар төрөппүттэр уонна убаастабыллаах ыалдьыттар, эһигини бүгүҥҥү сайыҥҥы чаҕылхай күнүнэн, олох киэҥ суолугар үктэнэр кэмҥит тиийэн кэлбитинэн “Кыым” норуот хаһыатын аатыттан итиитик-истиҥник эҕэрдэлиирбин көҥүллээҥ!
Бүгүн биһиги Хаҥалас улууһугар ыытыллыбыт “Тыа сирин оскуолатын кэскилэ” диэн тиэмэлээх тэрээһиҥҥэ кыттыыны ылан кэллибит. Манна олус элбэх дьокутаат, үөрэх салайааччылара ис сүрэхтэриттэн сахалыы тыыннаах тыа сирин оскуолаларын көмүскээн, өйөөн тыл эттилэр уонна утумнаахтык тэҥҥэ үлэлэһэргэ бэлэмнэрин биллэрдилэр.
Күндү “Айыы кыһатын” выпускниктара! 11 сыл тухары эккитигэр-хааҥҥытыгар иҥэриммит киэҥ билиигитинэн олус эппиэтинэстээх тургутууну ааһан, биир кэлим эксээмэн туттараары ситэн-хотон бэлэм сылдьаҕыт. Хас биирдиигит талбыт идэҕит үөрэҕэр киирэн, төрөөбүт дойдугутун ааттатар туһалаах дьон буолуоххут, ханна да буолларгыт сахалыы эйгэлээх кыһаҕа үөрэммиппит диэн киэн туттуоххут диэн эрэнэбин! Махтал! Таптал! Эрэл!
