Ыам ыйын 29 күнүгэр 3-с №-дээх куораттааҕы балыыһа иһинэн, искэн ыарыытыгар амбулаторнай көмө оҥорор өрөспүүбүлүкэ үрдүнэн бастакы киин аһылынна. Бу туһунан СӨ бырабыыталыстыбатын пресс-сулууспата иһитиннэрэр.
Хомойуох иһин, 2017 сыл түмүгүнэн Саха сирэ рак ыарыытын эрдэ булууга дойду үрдүнэн бүтэһик иннинээҕи миэстэҕэ сылдьар. Искэн ыарыыта киһи өлүүтүн иккис төрүөтүнэн буолар.
Ил Дархан Айсен Николаев маннык эттэ: “Ааспыт сыллаахха өрөспүүбүлүкэ үрдүнэн бу ынырык ыарыыттан 1300 тахса киһи өллө. Хомойуох иһин, маннык диагноһы 10% түгэҥҥэ дьон өлбүтүн кэннэ туруораллар. Ол аата дьон эмтэнэр кэмигэр искэн ыарыылааҕын билбэккэ сылдьар. Ол иһин, искэн ыарыытын эрдэ булан эмтэнэргэ маннык кииннэр олус наадалаахтар”.
Светлана Давыдова салайааччылаах куораттааҕы 3-с №-дээх балыыһа холобурунан, маннык кииннэр мэдэссиинэ атын тэрилтэлэригэр аһыллыахтара диэн Ил Дархан бэлиэтээн эттэ. Ол курдук, өрөспүүбүлүкэ үрдүнэн уопсайа 18 киин аһыллара былааннанар. Бу кииннэр инникитин тутулла турар өрөспүүбүлүкэтээҕи онкологическай диспансеры кытта быһаччы үлэлиэхтэрэ.
Куораттааҕы 3-с №-дээх балыыһа сүрүн бырааһа Светлана Давыдова, саҥа аһыллыбыт киин үрдүк технологиялаах диагностикалыыр тэриллэринэн хааччыйар, РФ доруобуйа харыстабылын министиэристибэтин бары ирдэбиллэригэр толору эппиэттиирин бэлиэтээтэ. Киин күнүскү стационарыгар үс куойкалаах уонна онколог быраас кэбиниэтэ баар.
“Доруобуйа харыстабыла” национальнай бырайыак чэрчитинэн 2019 сылга 9 киин аһыллара былааннанар. Ол иһигэр 4 –куорат поликлиникаларыгар, 5 – Алдан, Мииринэй, Мэҥэ Хаҥалас, Нерюнгри уонна Ньурба оройуоннарын киин балыыһаларыгар.
2020 сылга Бүлүү, Ленскэй уонна Хаҥалас киин балыыһаларыгар аһыллыахтара. 2021 сылга — Аммаҕа уонна Үөһээ Бүлүүгэ, 2022 сылга — Томпоҕо уонна Чурапчыга, 2023 сылга — Намҥа, 2024 сылга — Өлөөҥҥө.
