Бэс ыйын 1 күнэ – Оҕо көмүскэлин күнэ. “Ситим” медиа-бөлөх “Доруобай буол, кырачаан!” (Будь здоров, малыш!) диэн төрөппүттэргэ аналлаах дьоҕус ыйынньык-кинигэ таһаарда. Бүгүн сүрэхтэниитэ буолан ааста.
Кыра эрээри олус туһалаах ыйынньык-кинигэҕэ оҕолоох дьиэ кэргэҥҥэ сыһыаннаах араас иһитиннэриилэр, сүбэлэр-амалар киирдилэр. Холобур, оҕолоох дьиэ кэргэҥҥэ бэриллэр харчынан көмө, ийэ хапытаала, оҕоҕо бэриллэр быһыы (прививка), нолуок туһунан сиһилии суруллар. Жатайдааҕы балыыһа акушер-гинеколог бырааһа Ирина Петровна Захарова оҕо күүтэр кэрэ аҥаардар аһылыктарын, үрдүк категориялаах оҕо бырааһа Татьяна Владимировна Яковлева эмтэрии туһунан сүбэлэрэ-амалара киирдилэр. Ону таһынан, Арассыыйаҕа биллэр оҕо бырааһа, мэдиссиинэ билимин хандьыдаата, оҕо доруобуйатыгар сыһыаннаах үгүс кинигэ, бырагыраамма ааптара Евгений Комаровскай оҕо үчүгэйдик утуйарын туһугар уон быраабылата киирдэ.
Бүгүн, ыам ыйын 31 күнүгэр Дьокуускай куораттааҕы 4-с №-дээх поликлиникаҕа “Доруобай буол, кырачаан!” (Будь здоров, малыш!) ыйынньык-кинигэ сүрэхтэниитэ буолан ааста. Манна Дьокуускай куорат үлэ уонна нэһилиэнньэ социальнай өйөбүлүн салалтатын оҕолоох дьиэ кэргэни өйүүр социальнай салаа салайааччыта Марта Георгиевна Жиркова, СӨ доруобуйа харыстабылын туйгуна, киин куорат доруобуйа харыстабылын бочуоттаах үлэһитэ, үрдүк категориялаах быраас, репродукция уонна дьиэ кэргэн доруобуйатын харыстыыр киин салайааччыта Вера Матвеевна Алиева, “Дьокуускай куораттааҕы мэдиссиинэ киинэ” педиатрия салаатын сүрүн бырааһын солбуйааччы, үрдүк категориялаах оҕо бырааһа, Арассыыйа оҕо быраастарын сойууһун эрэгийиэннээҕи салаатын чилиэнэ Анастасия Михайловна Тотонова, Ил Түмэн дьокутаата, “Ситим” медиа-бөлөх генеральнай дириэктэрэ Мария Николаевна Христофорова уонна ийэлэр оҕолорун кытта кыттыыны ыллылар. Мустубут дьону саха эстрадатын ырыаһыттара Эрхан уонна Санита Ай уоллара Чаҕыл “Мин айылҕа оҕотунабын” диэн ырыатынан эҕэрдэлээтэ.
