Быйыл Ураһалаахха СӨ Суол-иис фондатын субсидиятыгар хапсаннар 10 мөлүйүөнтэн тахса сууммаҕа бөһүөлэк иһинээҕи суол өрөмүөннэниэхтээх. Билиҥҥэттэн бэлэмнэнии үлэ саҕаланна. Бу күннэргэ олорор сирдээх, техника тохтууругар бетоннаммыт стоянкалаах тупсаҕай көрүҥнээх киирии аартык арыллыыта нэһилиэк биир ситиһиитинэн буолла.
Ураһалаахха киирии саҥардыллан олохтоохтор үөрүүлэрэ үгүс буолла. Үлэни икки күтүөттэр Нурбек Ашурахманов уонна Александр Боллет ис санааларын ууран туран, хаачыстыбалаахтык оҥордулар. Нэһилиэккэ туох үлэ бара турарын баһылык Владимир Новиков билиһиннэрэр.
– Нэһилиэнньэ былырыыҥҥыттан оҕуруотунан күүскэ дьарыктанар, теплица аһын арааһын олордоллор. Биир төрүөтүнэн сайыҥҥы уу ситимэ холбоммута улахан оруоллаах дии саныыбын. Уу ситимин иккис сылын Николай Яковлев көрөр-харайар. Турбаларын тиһигин быспакка бэрэбиэркэлиир, күн ахсын кэриэтэ носуоһунан уу оботторон емкоһу толорор. Нэһилиэнньэ барыта холбонон олорор. Соҕотох олорор кырдьаҕастарбыт олохторо чэпчиирэ саарбахтаммат.
Быйыл нэһилиэккэ 3 мөлүйүөн сууммаҕа икки улахан үлэ ыытылла турар. Кэлин араас техника элбээн, суол оҥоруута нэһилиэккэ олус сытыы боппуруос буолла. Оскуолабытыгар тиийэр Молодежнай уулусса туруга мөлтөҕө оҕолор сайыҥҥы сынньалаҥнарыгар да мэһэйдэри үөскэтэр. Олохтоох дьокутааттар баҕа санаалара буолбута ыраатта. Быйыл аукциона ыытыллан, Молодежная уулуссаны оҥоруу саҕаланыа. Родион Петрович Алексеев диэн урбаанньыт кыайыылаах таҕыста. Контрагын баттаан саҕалыахпыт. Матырыйаала миэстэтигэр баар. Суол уһуна 500 миэтэрэ. Үлэтин сыаната 1,5 мөлүйүөн. Саҥа суол оҥоһулуннаҕына инникитин эбии сырдатыыга үлэлэһиэхпит диэн баҕа санаалаахпыт.
Олохтоох дьаһалта дьиэтин капитальнай өрөмүөнэ саҕаланна. Муостата, үрдэ, уот ситимэ, ис эркинэ саҥардыллыа. Былырыын уот-күүс көдьүүһүн контрагынан туннуктэр уонна киирии аан оноһуллубута. Үлэ бүттэҕинэ олохтоох дьаһалта исписэлиистэригэр табыгастаах усулуобуйа үөскүө. Манна даҕатан эттэххэ, дьаһалтаҕа нэһилиэнньэ барыта сылдьар, онон ис-тас өттө туспаҕай буолара санааны көтөҕүө дии саныыбын.
Суол-иис фондатыгар субсидияҕа тырааныспар министиэристибэтин кытары сөбүлэҥ баттастыбыт. Даҕатан эттэххэ сөбүлэҥи быйыл өрөспүүбүлүкэ үрдүнэн 13 нэһилиэнньэлээх пуун баттаста. Уопсай сууммата 209 мөлүйүөнтэн тахса. Биһиэхэ бэриллибит суумма – 10 мөлүйүөнтэн тахса. Бу харчыга 800-тэн тахса миэтэрэ суол оҥоһуллуо, бу иһигэр 500-тэн тахса миэтэрэ Ефимова уулусса, 200-тэн тахса – Зеленай переулок. Үбэ-харчыта тырааныспар министиэристибэтиттэн улуус дьаһалтатын аатыгар киириэхтээх. Аукцион түмүгүнэн ким үлэни ыытара быһаарыллыа. Билигин кэпсэтии, бэлэмнэнии саҕаланна. Аҥардас гравий 2,5 тыһыынча куб ирдэнэр.
Хаарбах дьиэттэн көһөрүү бырагырааматынан биэс дьиэ көтүрүллүөхттэх. Ефимова 7 аадырыска сири түүлэһии аукционугар «Стройкон» ХЭТ кыайда. Ол учаастагар турар хаарбах дьиэни көтүрүүнү муниципалитет ыытар.
“Хотугу Кыым” хаһыат, ulus.media
