От ыйын 12-14 күннэригэр Хаҥалас улууһун Орто Дойду сиригэр, сомоҕолоһуу сылыгар анаммыт “ТАБЫС” диэн саха ыччатын бастакы бэстибээлэ ыытылынна.
Манна 20 улуустан уонна биэс уопсастыбаннай түмсүүттэн 600 тахса ыччат кытынна. Кинилэр дьыалабыай оонньууга, успуортка уонна испэктээк куоҥкуруһугар күрэстэстилэр. Ону таһынан, маастардар бэйэлэрин оҥоһуктарын көрдөрдүлэр.
Бэстибээл түмүгүнэн Мэҥэ Хаҥалас ыччата бастакы миэстэни ылла уонна сабыс-саҥа УАЗ массыынаны бэлэх тутта. Оттон иккис миэстэни Хаҥалас улууһа ылла. Кинилэр “Эго пласт” 300 тыһ суумалаах сэртипикээтинэн наҕараадаланнылар. Бочуоттаах үһүс миэстэҕэ Бүлүүлэр таҕыстылар уонна “Тимир строй сервис” хампаанньаттан 150 тыһ суумалаах сэртипикээти туттулар.
Уопсастыбаннай түмсүүлэр ортолоругар ХИФУ устудьуоннарын профсойуустарын тэрилтэтэ бастаата уонна 150 тыһ солк наҕараадаланна. Иккис миэстэни уонна 100 тыһ солк Ил Түмэн иһинэн Ыччат парламенын хамаандата ылла. “Дойду ситимэ” диэн Мэҥэ Хаҥалас улууһун түмсүүтэ үһүс буолла уонна 70 тыһ солк наҕараадаланна.
СӨ ыччат уонна социальнай коммуникация миниистирэ Степан Саргыдаев бэстибээл кыттыылаахтарыгар, тэрийээччилэригэр, волонтердарга улахан махталын тиэртэ.
СИА хаартыската
